| Description |
Transcription (La Ring)
La jahku sha ni a lam. Amyu Wunpawng sha ni a Kaji Kawoi "Ja Nyi" yan "Ja Nga" gaw, kashu kasha kasha la kasha marai jahku hpe mung shangai shaprat dat ai. Ndai la jahku sha ni hta na La n-gam ngu na gaw Red Indian amyu re. La n-naw gaw Miwa amyu re, La n-la gaw Sam amyu re, Tu gaw Kadu-Kanan amyu re, Tang gaw Hkang amyu, Yaw gaw Pawng Yawng Shapawng Yawng Wunpawng Amyu sha, Hka gaw Gurkha amyu, Sharoi gaw Tibet amyu, Kying gaw Kate amyu re ngu hku Ji Woi Ji Wa ni dai hku na la jahku sha ni a lam hpe dai hku hkai da ma ai. Ndai ni gaw Majoi Shingra Bum Mongolia kaw nna bra mat wa ai rai nga ai. Kadai mung kadai tinang sa mayu ai maga de me hkawm sa, bra mat wa shajang masai. Shada da tsan gang mat wa ai hte rau tsun shaga ai ga hpan ni mung shai mat wa sai sha n-ga shanu nga pra ai lamu ga ginra katsi kahtet hta hkan nna amyu bawsang langai hte langai a hpraw nsam ni mung shai mat wa ai. Ndai gaw.. chyum laika Ningpawt Ninghpang laika daw kaba shi, daw kaji langai kaw na sumshi lahkawng hta, Noa kasha Shem, Ham, Yahpet ni kaw na mayat maya nga pra wa ai, mungkan ting na amyu masha ni hte mungdan ni tai wa sai ni hpe hkai ginlen ai rai na sai. Ndai ginru ginsa labau gaw Wunpawng sha ni hkai ai "Shinggyim masha yawng gaw Majoi Shingra Bum kaw na bra hkrat wa ai" ngu labau hta teng man ai hku aja awa madi shadaw ai lam mung nga nga ai. La jahku sha ni hta La n-yaw a matu rai nga ai Wunpawng Amyu shi ni mung Majoi Shingra Bum kaw na bra hkrat wa ai ni rai nga. Ten galu nga pra hkawm mat wa ai majaw mung, amyu hpan langai hte langai tsun shaga hkat ai, ga hkum ni nchye na hkat mat wa ai majaw mung amyu hpan langai mi hku nna hkrai nre sha kaga ga.. shaga mat wa ai rai na sai. Chyum laika Ningpawt Ninghpang laika daw kaba shi langai, daw kaji langai kaw na jahku hta, dai hpe madi madun da ai lam "Jinghpaw Wunpawng amyu sha ni Mongolia Mung Ling Mung Hpang shing nrai Kasung Kase ga kaw nna Kansu Shinghai ga de BC 2,000 ning grupyin hta du shang wa ai lam, ndai zawn ginru ginsa hkrat wa ai lam rai saga ai. Ndai shara ni gaw Shinghai lamu ga na Zai Dam Pa hta mying dan hkung ai "Ko Ko Naw Hka Nawng" kaba langai mi nga ai. Ndai shara gaw sagu bainam rem sha ai ni, mungkan a sinpraw ka-ang tsingdu tsingman prang dam pa ni hta ginru ginsa, rem lu rem sha htawt shang wa ai dai majaw anhte Wunpawng sha ni hkai tsun ai labau hta Shanghai ga Shinghai ga gaw "Marawn jahku rwi, hkanu jahku lwi, nawng jahku hprwi" ai shara re nga ma ai. Ndai ginra hta nhprang sut rai hkum dingnun pru ai, rem lu rem sha manu ai, lu hka kaja ai shara ni re majaw anhte a amyu bawsang ni shaning tsa kaba hti nna nga ningdi lai wa yu sai. BC 2,000 grupyin hta Kansu Tawu Kadit Hkam Wam hkan "Sagu bainam rem sha, tawn hkungri galaw lai, sha-u ing ai mau bung hkai, tinang buhpun palawng hkan banbyau bansi noi hkrat ai htung hkying, si ai wa a minla hpe Ji Wa ni daju de sa dat ai ginlam ni" rai nga ai.
|
