| Description |
Transcription (Htu Bu)
Moi gaw ndai Mali hka, Mali Hku ngu ai shara ndai de e, Masha nga ai kahtawng hkan e mung, bum shagawng hkan e mung, hkyen grai hkat ai da. Hkyen grai hkrat ai majaw, ndai kaw si hpang gara na si ai masha mung grai nga sai da. Nau katsi ai majaw sai ge nna si ai masha ma grai nga sai. Bai nna hkyen ni kamyet tawn na nta daw nna si ai mung grai nga sai da. Moi prat kaw na dai hku byin ma ai da. Lami mi hta na gaw dingla langai mi gaw shi myit yu ai. Shi yu myit yu ai moi kaw na masha ni tsun ai, Ndai, ndai hkyen ndai gaw, shi hkrai byin ai n re. Anat dingla wa, Sinlap ngu ai anat dingla wa e shabyin dat ai re nga, ndai maumwi na yu ai. Ndai hpe kadai mung n sa tawngban ya lu lu rai. Ndai hpe sa tawngban jang, ndai, ndai hkyen ndai ni gaw hkrat ai shadang yawm mat wa na, nau n katsi na, jan marang hkrak ai hku na galaw lu galaw sha lu na re, nga ndai hpe chye ai. Moi na salang ni htet tawn da ai ga ndai na ai. Ya raitim mung shanhte gaw ndai dingla wa shanhte nta kaji sha re, hkyen nau htat nna, nta mung daw wa na tai sai, shat lusha tam lu tam sha na mung yak ai. Htingbu htingpyen hkawm na matu mung grai jam jau ai majaw, shi lu ai shayi sha marai masum hpe shaga ai. "Gai nanhte, nan nau ni marai masum ra hte na oh.. Sinlap nat kaw sa nna, ndai anhte Mali Hku, ndai ginra de e, ndai nbung laru, hkyen nbung laru n jahkrat na matu hkyen nau n htat na matu, ndai jahtoi kau ya na matu, sa tawngban mu, sa tawngban yang mai ai da. Moi na salang ni tsun tawn da ai. Ya ngai ningwa tsun ai shaloi atsawm sha madat la mu. Ndai Sinlap nat ndai kaw e, hkyen jahkrat dat dat re, nat Sinlap ndai kaw sa lu na matu gaw, ndai nhtu hpe e, ning rai na, sharawt lang na sa a.i Dai shaloi gaw masha lai na lam ding yang hku mat wa na re. Dai hku sa, kade kashung kade ta kade gying ai raitim, N mai jahkrat ai ndai n mai jahkrat ai. Kaw si tim hkum jahkrat, kashung tim dai hkan e hkyen kade bum ya tim hkum jahkrat. Ndai hku hkawm, ndai jahkrat jang lam mat mat na re. Dai langai. Dai Sinlap nat nga ai shara kaw du jang, Mu Nbawng Ban ngu ai jawban ahkyeng re U langai mi nga ai. Dai wa Sinlap nat nga ai makau de du jang dai wa shawng sa na ra ai. Dai U dai gaw baw kaw sa dung na kun, lata kaw kun, kahpa kaw kun, na ahkum kaw e, shi dung mayu ai shara kaw sa dung na re. Hkum hkrit, atsawm tsun u. "E, chyeju madu e, U e, Sinlap nat nga ai nta naw sa madun ya rit law." ngu na dai hku tsun jang, Shi pyen mat wa ai de mi hkan nang, dai hku hkan nang sa i nga jang e, nta kaw du na ra ai. Dai nta kaw du ai shaloi, masha mi nga, n nga nga, dai nta hte seng ai arung arai hpa mung hkum sa hta jum, Nta madu ni sha n shaga yang shaga ma hkum shaga, rai mu. Nta madu ni san jang, Sinlap nat hpe e tsun u, 'Ndai anhte Mali Hku Majoi de e, ahkyen nau htat ai. Galaw lu galaw sha n mai ai. Kashung na si ai masha law ai. Kaw si nna si ai masha law ai. Nta daw kamyet nna si ai masha grai law ai. Ndai zawn rai jam jau nga ga ai. Nang naw hkye la mi. Ahkyen nau hkum jahtu ya.' ngu na sa tawngban mu." ngu na tsun dat ai. Dai shaloi gaw kana jan ma Hkawn ngu na hpe shawng tsun dat ai. "Gai, nang shawng, nang kana re nang shawng sa u. Ndai nhtu hkum jahkrat re lu. Ndai jahkrat dat jang alam n mu mat na ra ai." ngu. Sa wa sai da. Dai hku sa mat wa re shaloi gaw kaja wa, nat dingla nga ai makau kaw sa du ai shaloi, dai jawban ahkyeng re U langai, gaw pyen hkrat na kahpa kaw, kahpa kaw e sa dung ai da. Shi kajawng na kalang ta ahpre jahkrat kau dat ai da. Rai jang gaw ndai U hpe atsawm n tsun ai re nga yang, dai U dai mung shi ra ai de mi pyen mat wa jang gaw, dai U pyen mat wa ai de hkan hkan hkan re nga jang gaw sa dam si mat sai da. Nta kaw nga ai dingla wa gaw, la taw nga ai. "Ga.. ya nbung laru mung grau ja, hkyen mung grau htat wa re gaw, ndai nye kasha ma Hkawn gaw ngai tsun dat ai ga, lama lama gaw shi shut sai. Dai majaw hpa shi n na ai she rai na sai. Ya gaw ma Lu bai sa su. Dai wa tsun ai hte maren dai hku sa galaw u." ngu tsun ai da. Kaja wa nhtu dai hku shachyen lang na sa. Sinlap nat nga ai kaw du jang U langai mi shi lata kaw sa pyen dung ai hpe shi gaw tsun ai, "E, chyeju madu U e, Sinlap nat nga ai shara gara kaw re ai kun law. Naw madun ya rit ngu jang dai U dai gaw pyen mat wa ai. Pyen mat wa ai de hkan nang, hkan sa yu yang nta langai mi nga taw nga. Dai kaw shang wa ai shaloi gaw, masha kadai mung gaw n nga, kadai mung gaw n nga. Shi mung grai kaw si ai re nga yang shi shat gawk de sa yu yang gaw shat grai hkrak hkra hkyen tawn da ai, shat sapoi nga taw nga ai. Nau kaw si nna she shi dai sha, sha ngut ai hte Sinlap nat pru wa ai da. Pru wa na she, Sinlap nat mung grai kaw si na wa. "Nang nye ahkaw ahkang n lu ai, nye shat shang sha kau ya ai!" ngu na dai kaw adup sat kau ai da. Adup sat kau ai hpang e mung ndai hkyen marang gaw htu tik tik grau she kaba wa, grau she kaba wa rai. Kawa bai tsun ai da, "Ma Lu mung ngai tsun dat ai ga n hkan sai. Dai majaw na ai rai na re. Ma Roi nang bai sa u." bai ngu. Sa ai shaloi gaw, dai kawa tsun ai hte maren sa mat wa. Sinlap nat nta makau mayang de du ai shaloi gaw, U bai sa ai. Sa dung ai shaloi tsun ai, "E, chyeju madu U e, Sinlap nat nga ai shara madun ya rit." nga dai hku tsun ai shaloi, dai U pyen mat wa de bai hkan nang yang gaw ani sha kaw, Sinlap nat wa nga ai nta kaw du bang wa sai da. Chyinghka hpaw nga ai rai, kawa gaw, "Kadai n nga jang nhku hkum shang. Arai hpa mung hkum lang. N san yang hpa mung hkum tsun." ngu dat ai. Ma Roi gaw galoi mung dai myit dum nga. Masha nga ai re majaw shi shang wa ai shaloi dai kaw, Sinlap nat n'gai jan baw ahpraw re, langai mi nga taw nga. Dai wa hpe tsun ai da. "Ya ngai gaw, wa, ndai hkyen nau htat ai majaw, hkyen nau n htu na matu ndai nat dingla hpe ndai aji du hpe e sa tawngban na matu sa ai re." ngu na tsun ai. "Ga, nang kade kaw si tim shat naw shadu u." ngu da. "Shat naw shadu u." ngu na, shat shadu shangun. Shat hkut ai hte dai nat Sinlap dingla du wa sai. Dai shaloi, du wa ai shaloi gaw, "Hpa rai na sa ai? Kaning rai na sa ai? n san sai. Ya shat sha ngut ai hpang e she tsun ga. Ngai mung grai kaw si sai re majaw." ngu na. Shat shadu sha ngut re shaloi she, Sinlap wa gaw dai Mali Hku Roi Ja hpe san ai, "Dai hku dai hku rai na sa ai re. Hkyen nau hkrat ai majaw wa tsun dat ai, ahkyen loi mi shayawm kau na da. Hkai lu hkai sha yak. Shinggyim masha ni grai si jawng mat wa sai. Nau kashung ai majaw, kaw si ai majaw, nta daw ai majaw." ngu na tsun ai shaloi gaw, "Ma e, ya ndai an sha ngam ai shat ndai hpe le ra nta kaw na gumgai jan hpe sa jaw su." ngu na tsun ai da. Manam du, manam kasha she re nga yang gaw, shat si mai gaw hpai pru wa na, shinggan kaw du jang gaw gara de sa wa ai baw re mung n chye. Majoi sa tsap nga ai shaloi gaw, mi na U dai wa shi kaw bai sa dung. Jang gaw, "E, U e, oh ra kaw na gumgai jan a nta naw sa madun rit law." ngu na tsun jang, U pyen mat wa ai de hkan nang yang gaw ani sha gumgai jan kaw bai shang nna she, n'gai jan gaw, "Hpa rai sa wa n'ni?" ngu tsun ai shaloi, "Ndai dwi hpe e, ndai shat lusha jaw sha na matu sa ai re." ngu jang, gumgai jan grai kabu ai da. Grai kabu nna shat dai hkap sha la. Shat sha ngut jang gaw dai num sha mung shinggan de du mat wa ai shaloi, gumgai jan gaw, "Chyahkring mi naw hkring yu u. Dai nang la sa ai, hka wan mung naw la dat yu u. Nang hpe mung kumhpa lama mi jaw dat de ga." nga ai majaw, Roi Ja gaw dai hku la nga ai shaloi, hpa n re da. Ari hte shamit jaw dat ai da. Hpa di baw re mung n chye. Dai lang mat wa sai da. Dai lang nna wa re shaloi gaw, ndai Sinlap dingla wa gaw, shan hpyi langai mi garawt pru wa na, ndai hpe zen, grai htuk hkra zen nna, "Shan hpyi palawng, ngai mung grai kashung ai shan hpyi palawng langai mi chywi ya rit. Poi shingra hkan e, hpun mai ai baw palawng chywi ya rit." ngu ai da. Dai Roi Ja dai mung shan hpyi dai gaw la lang tawn da na, gara hku chywi na re mung n chye. Majoi mi la jum nna tsap nga sai da. Dai shaloi gaw mi shi shat sa jaw ai gumgai jan bai sa wa ai. "Hpa baw rai na tsap nga n'ni?" ngu san ai shaloi, "Ndai nta madu wa gaw ndai shan hpyi zen di nna e, palawng grai tsawm ai, poi shingra hkan e hpun mai ai baw palawng chywi ya rit nga na tsun ai law. Hpawtde shi palawng ndai ra ai da." nga jang, ndai gumgai jan mi kawn nga ai gumgai jan gaw nbang de pru nna, "Oi.. ndai nta na ali ama ni, hkawn zet hkawn tsawm ni e, naw pru wa yu marit." ngu "Sa wa marit law. Zen dau la lang, ri, samit la lang rai na sa wa marit law." ngu na jahtau dat jang, mahkawn kasha mali, manga, kru yan pru wa ai da. Gumgai jan gaw tsun ai, "Ndai ma lang ai shan hpyi, ndai hpe e zen nna, ndai Sinlap nat du wa palawng ra ai da. Grai tsawm nna chywi mu. Dai na ngut ra ai da. Hpawtde shi hpun na re da." ngu na tsun ai da. Rai jang kaja wa dai shana yawng atsawm sha di nna, palawng dai chywi shangut ya sai da. Hpang jahpawt Sinlap nat du wa wa nna palawng dai sa hta hpun na gaw grai kabu mat sai da. Dai shaloi she, Sinlap nat gaw, "Ya ndai ahkyen jahkrat ai nbung laru wa shangun ai mung ngai re. Nang gaw ngai a n'rum n'tau tai nu. Hpang de gaw ngai galaw ai bungli nang galaw matu ra na re. Ndai hka hku mung de hkyen hkrat ai ndai gaw, ahkyen htat ai gaw na lata kaw sha re." ngu na dai Mali Hku Roi Ja gaw dai Sinlap wa hte nga ai, dai kaw na ndai Mali Hku ndai n'ga de e moi na ram ahkyen n taw mat ai. Galaw lu galaw sha mai mat wa ai gaw, dai shani kaw na re da. Mali Hku Roi Ja ngu ai wa, ndai Mali hka, hka hku de nga ai masha yawng hpe hkye ai gaw ndai jan rai sai da. |
