| Description |
Ndai kalang gaw magwi hte sharaw hpaji shingjawng hkat ai lam tsun dan na re. Moi shawng de da magwi langai mi gaw shi a maling kaw shi grai nga jin ai majaw dai shi dai maling kaw shi grai nga jin ai majaw shi gaw dai maling du hkawhkam kaba re da. Dai mali kaw shi nga jin wa re majaw she kaga de mung hkawm yu na kun ngu na shi myit ai majaw shi gaw kaga mali de hkawm chyai mat wa ai da. Hkawm mat wa re shaloi gaw aw mali law law tawt mat wa ai da. Dan na she sharaw nga ai mali de du mat wa ai da. Sharaw nga ai de du mat wa re shaloi gaw sharaw gaw shi hpe hkap jep ai da. Ndai gaw kaning re dusat re kun? nye a shara de nye a shara de sa wa ai nang gaw kaning re re kun? nang gaw kade ram hkyik ai re ni, ngai gaw nye a mali de sa wa ai rai yawng mayawng dusat dumyeng yawng ma yawng hpe ngai galoi ma ngai sha ai wa re. Ya mung nang nye shat tai mayu ai majaw ya ndai shara de sa wa ai nre i ngu da. Dan ngu tsun re shaloi gaw magwi gaw aw nang dai kachyi sha law gaw na hta grau kaba ai hpe nang dan ngu tsun ai i da. Ngai kaw mung nye a tsam hte ngai nga taw ai re, nye mali kaw ngai hkawhkam re, ngai hpe dai hku hkum sa tsun nang hpe mahtang ngai sha yang sha kau na ngai hpe dai hku hkum sa tsun ngu da, dai shaloi gaw sharaw gaw tsun ai da. Aw nang gaw ngai e grai roi ai she re hka i, nang hte ngai kadai grau hkyik ai lam hpe shingjawng yu ga le ngu tsun ai da. Dai shaloi gaw mai ai ngu da. Sharaw gaw gara gara lam hku shingjawng na rai? ngu tsun ai da, gai an yen 2 masha law law nga ai mare kahtawng makau de sa ga. Dan re na an yen 2 sa gawp ga dai shaloi sa marawn ga. Shinggyin masha ni kadai hpe mahtang hkrit ai kun?shinggyin masha hkrit ai wa gaw dang sai ga re. Dan ngu na tsun she shinggyin masha ni hkrit ai wa gaw n hkrit ai dang ai wa gaw sum ai wa hpe sha kau u ga dai hku sha kau ai hku na galaw na re ngu na dai hku myit hkum na hkawm mat wa sai da. Sa mat wa re shaloi gaw magwi shawng gawp ai da, magwi ngoi dat re hte gaw dai kaw na masha ni gaw shanhte gaw du shayi sha hpe la jang dai palawng kaw e dai magwi kawng hte galaw da ai hkindang palawng dai hpun ai. Dai majaw magwi kawng hpe grai ra ma ai da. Dan na she num la ai kaw mung magwi kawng hpe shanhte ni magwi kawng hpe bang ai re majaw magwi kawng hpe gaw shanhte grai manu shadan na shanhte grai ra na hku re nga. Dan na she mare masha ni gaw e ya chyawm me gaw aw sut gan nnan bai du sai lo oh, dumhpau hpai mu lo, n htu hpai mu lo lasawn hpai mu magwi hpe rim ga, magwi kawng la ga ngu na tsun na marawn ma ai da. Dai shaloi gaw grai re sai sharaw nang bai marawn yu ngu da, bai gawp ai shaloi gaw mare masha ni e wang chyinghka ni shachyip mu, mare bumhku kum mu, sharaw she ngoi re nga ai, ma ni hpe mung atsawm zing mu, ma ni hpe mung shinggan de atsawm shahpraw mu, kanu kawa ni hte a tsawm di na yu mu. Sharaw gawp nga re nga ai lo, chyinghka ni a tsawm di na shachyip mu lo ngu na she marawn ai nsen na ai da. Dai shaloi gaw sharaw gaw tsun sai da. Gai kadai hpe hkrit ai ngu chye na sai n re i, ya gaw nang hpe ngai sha kau sa na, nang hpe ngai sha sa na ngu sai da. Dai shaloi gaw ga a ya ngai hpe ya jang jang gaw hkum sha kau shi law. Nye a amyu ni grai law nga ai, nye a myu ni grai naw nga ai, nye a magwi amyu ni grai naw nga ai. Nye mali de wa na ngai nye amyu ni hpe ngai naw wa tsun kau da na. Ngai nang kaw sa ai marang e na shat tai sa na, ngai nye a bungli hpe ngai lit wa galai kau da ya na dai ahkang gaw naw jaw rit. Ngai hpe 3 ya ngu na shani ngai 3 ya ngu na shani bai sa wa na. Dai ten du hkra a hkang jaw rit ngu tsun dat ai da. 3 ya sha a hkang jaw rit ngu ngai nang kaw n hprai ai sha bai sa wa na ngu tsun ai da. Dai shaloi gaw sharaw gaw mai ai le, dai hku nga mo, ngai lusha chyalu re nga mi sa u wa su ngu da. Dai shaloi gaw magwi gaw hkrap na wa mat ai da, shi a magwi amyu ni hpe wa tsun dan na shi grai myitru na shi gaw gara hku wa tsun dan sa na kun ngu na shi grai myit ru let shi gaw hkrap na wa mat ai da. Lam amyu shagu hpe shi sumru na shi hkrap na wa mat sai da. Lam ka-ang ngu na yang kaw du ai shaloi gaw wu-lu langai mi kaw hka n rawng mat ai majaw jan nau lahtet ai majaw ngang ga taw nga ai shara langai mi nga ai da. Dai wu-lu hpe shu kasha langai mi gaw dai ngang ga taw na ai lapran kaw shi dai kaw rawng taw nga ai da. Shi gaw marang htu na la na she shi gaw lamu de yu madat taw nga da. Mada taw re kaw she shanyip nyip wa ai hte magwi a shingna gaw lai wa na hku nga. Shanyip nyip ai na dat ai she kalang ta dai kaw wa hka kahte wa ai da. Shi gaw shu gaw hpa mi nga nga marang htu sai ngu na kabu kau ai da. Mata yu yang wa ashum nga taw ai da. Ga shawoi na marang gaw dai ni na marang gaw hpa kun? lamu ga ntsa de hpa baw byin ai kun ngai naw wa yu yu nre ngu na lung yu da. Kahtan lung wa re na she dai ga kawng kaw dung taw shaloi gaw magwi hpe wa mu ai da. Magwi langai mi grai yawn na grai hkrap na wa ai hpe mu ai shaloi gaw shu tek gaw san sai da. E e hkaw magwi e kaning re na wa a myit yawn nga ni? Nang dai ram ram a kam asham re na kaba ai a bawng a lang re wa mi hpa baw myit ru ai lam ni nga na nang yawn nga kun ngai hpe tsun dan yu rit le. Shi gaw e e nang ngai e lu garum la lu na nre law aw. Hkum san sanu ngai nye lam hte ngai rai nga sanu ga ngu da, she tsun dan yu law, nang e ngai garum la lu ai lam nga yang ngai garum la lu ai lam nga yang garum la na teng sha ngai e tsun dan rit ngu da. Dai shaloi gaw magwi gaw hpa mi raitim myit shapyaw la ai hku na sha re yang re u ga nga na she dai shu tek hpe byin mat lai wa sai lam ni yawng hkra shu tek hpe tsun dan ai da. Sha katut sa na re lam ni yawng tsun dan ai da. Dai shaloi gaw shu tek gaw tsun ai da, hkum tsang da. Na amyu ni kaw ma wa jahkum da na nang teng sha shi tsun da ai hte maren 3 ya ngu na shani hta nang bai sa wa rit. Dai shaloi nang dai hpe shaga la rit, ngai ndai lam ni hpe ngai nang hpe ngai galaw ya na. Ngai garum ya na ngu tsun dan ai da. Dai shaloi gaw dai magwi gaw kam gaw n kam ai retim kaning n chye di ai, garum la na she nga gaw ngu na dai hku madat shalai kau na wa mat ai da. Wa mat na she dai tsun dan ra ai lam ni yawng tsun dan kau da ai da. Tsun dan kau da re na she woi sa mat wa sai. Sa mat wa sai da, shaloi gaw dai shi a magwi amyu ni shi a jinghku jingyu ni shi a dai mi na shi a magwi amyu ni mung yawng hkra hte shi hpe grai yawn let sa sa ma ai da. Dai shara de sa sa na matu myit na yawng hkra hte sa sa ma ai da, grai yawn na sa sa dat she dai shaloi gaw dai n gang ga ai kaw she e hkau shu tek e nang e dai ni nang ngai kaw hkan na nga hkan rit le ngu tsun ai she shu mung rawt na hkan nang ai da. Hkan nang mat wa re shaloi sharaw kaw du wa shaloi shu gaw tsun sai da. Sharaw nang gaw lachyum n pru ai wa mi magwi e sha na nga gaw nang e gaw ngai grai nan mau sai. Nang wa kaning re na dan ngu gwi ai re ni nang kaning re na magwi hpe sha gwi hkra hkra nang kade ram wa atsam rawng dum ai. Nang kade ram byin dum ai ngu, sharaw gaw shu tek e nang hpa n chye ai law, hpa hkum sa shaga u law kabye sat kau na dai kaw hkum ngoi nga u hkum krak nga u. Dai shaloi gaw shu tek gaw tsun ai da, e ngai kaji timmung ngai hta ngai kaw e nang hta grau ai ngai nga ai. Nang hte ngai shingjanwg na i ngu da. Dai shaloi gaw sharaw gaw mai ai le. Nang zawn re hte shingjawng yu ga le. Ngut na she kaning re, gara hku shingjawng na ngu dai shaloi gaw shu tek gaw kaga hku n shingjawng ai. Kagat shingjawng ga lagat shingjawng jang re sai ngu da. Kade lang ma nre anhte 3 lang sha shingjawng ga. Dai shaloi gaw mai ai mai ai, gat shingjawng ga ngu na she sharaw wa gaw gau ngwi sha hkawm mat wa, sharaw hkawm mat wa ai hte she dai shu tek gaw sharaw n mai kaw gra kahtan kap na she du krung de bai kahtan kap re na she du krung de bai kap na she dai kaw kap na she sharaw du wa ai hte sharaw a shawng e shawng shi shawng tsap na she shi ngup kaw kap na gawa da ai da, nang ngai e grai roi ai i, maw ndai na n ji hkai wa hpe sha ai mun re yaw. Ngai nanhte amyu ni hpe sha lai wa ai re nga sa prat dan ai da. Kalang bai ndai kalang gaw ngai loi chyang mat wa sai ngu na she myit na she loi mi bai kagat na she kalang bai mi na zawn zawn sha masat da ai shara kaw ndu shi yang tsat re na she ntsa de bai lung wa na maw ndai gaw na n ji dwi hpe sha da ai mun re myit dik sai i ngu da. Hpang kalang bai kagat na she ndai kalang bai gawa da na ndai gaw na nwa hpe sha ai mun re yaw ngu prat dan ai da. Ya nang hpe ngai bai sha na nang gara hku mi ngu ai shaloi gaw sharaw gaw e ngai hpe gaw hkum sha sa nu lo. Shu tek e nang hpe ngai grai tawng ban ai ngu tsun ai da. Shaloi gaw shu tek tsun ai da, nang magwi hpe dai zawn nga ya nang kaw bai du jang gaw kaning nga hkam sha ai rai da. Anhte dusat dumyeng ni gaw myit hkrum na nga yang lam shagu hta awng dang ai re. Ya dai ni kaw na nang magwi hpe sha na re yang ngai mung nang hpe sha na ngu tsun ai da, dai shaloi gaw magwi hpe mung n sha sa na ngu tawng ban ai lo ngu tsun ai da. Dan na dai magwi hte shu tek mung galoi mung jinghku byin ai sha n ga na sharaw shi nan hte shu tek mung jinghku byin mat ai da. Dai magwi hte shi a amyu ni mung shi magwi si mat sa na re ngu na sa sa dat ai ni mung grai kabu na bai n htang wa mat ai da. |
