Previous item Next item
Item details
Item ID
KK1-0422
(Collection Details)
Title Mahtum mahta kaw nna ginru ginsa yu hkrat sa wa ai lam (The Kachin migration)
Description Transcription (La Ring)
Shawng na lang gaw nambat langai na e shinggyim masha ni mungkan ga de nga pra shangun ai lam re. Ya na lang gaw nambat lahkawng ngu na mahtum mahta mung kaw nna ginru ginsa yu hkrat sa wa ai lam hpe ngai chye chyang dep hkap ai made salang ni tsun ai hpe madat hta la nna ka tawn ai hpe hti shana na re. Mahtum mahta du ni kaw nna shawng nnan mungkan ga de mayat maya law htam sa wa na madu daru ningyawng hte magam ningtawng amyu ni jahkrat nna nga pra shangun yang tara nlang nhkru nkaja ai ni chyu rai wa sai majaw majoi sha-u sha-ing nna wundap sat kau sai nga ma ai. Dai hpang mahtum mahta du ni gaw mungkan ga de bai lang mi magam chyinghti hte daru chyingni amyu ni hpe ginru ginsa bai jahkrat yang shakawn nga shakawn gwi shakawn u ni hte hpawn di nna jahkrat dat sai nga ma ai. Shing rai ginru ginsa yu hkrat wa yang mahtum mahta lunghtawn hkringdawt kaw nmai lai yu wa yang "Magri gumhpraw lakang hta yu wa na kun tsading tsapap ginsa lakang hta yu wa na kun" ngu san yang "Ginsa lakang hta yu wa na" nga nna tsunn ma ai. Dai majaw mahtum mahta du ni gaw tsading tsapap ginsa lakang htan ya ai hta lai yu wa masai nga ma ai. Ginru ginsa yu hkrat wa ai rai yang mahtum mahta du ni numhtet dat ai gaw "Matsi hku majoi gaw nat majoi rai u ga, bai chyaihku majoi hte hkranghku majoi gaw shinggyim masha majoi rai u ga" ngu numhtet dat sai nga ma ai. Shingrai ginru ginsa bai matut nna yu hkrat wa yang nmai lai ai shara du yang mahtum mahta du ni hpe bai htang tsun yang "Ga ngwi ga pyaw shaga nna lai yu wa mu" ngu tsun dat ai majaw ga ngwi ga pyaw tsun nna lai yu wa lu sai nga ma ai. Dai hpang mung bai matut nna lai yu wa yang tsingdu yang du ai shaloi "Tsingdu dan majan hpe malut lap hte ahtu kama kamang nna lai yu wa mu" ngu matsun dat sai. Dai tsingdu yang du yang shakawn u le pru wa nna mahtum mahta du ni hpe bai lung tsun yang "Ya gaw rim gaw nlu na sai gap sat mu" ngu tsun ai majaw ginru ginsa woi ai lamu la hpan sang wa kaw nna shi lang ai ndan hte gap sat ya sai. U hpyin chyauya ngu ai wa dai u hpe hpyin yang lawu na hte maren byin pru wa ai nga ma ai. 1) Manaw daw yang hkanggawt u tai sai 2) nhka gye yang hpyengbai u tai ai 3) gupra gupsi shaw yang ukrang naw dingyau tai ai 4) ya ut shaw yang marip num nan hkra tai sai 5) myi shaw yang tsau kawng u tai ai 6) baw daw yang u hku du pawnglawng tai ai 7) du daw yang tat hkang u tai wa sai 8) mai htawng daw yang dinggaw tai ai 9) lapai singkaw daw yang bwi di tai ai 10) lahkra singkaw daw yang sumbwi tai ai 11) sai shaw yang pat tai ai (Laika gayet ai wa na note: 12 nlawm taw a hku re) 13) shinglet shaw yang mam ting shabyi byit u tai sai 14) u mun baw yang pasi tai sai 14) lahkra lagaw daw ai hpe ginru ginsa la ni gun lang wa sai (Ndai kaw gaw 14 lahkawng bai rai wa ai) 15) lapai lagaw daw yang yi sawm lahpri tai ai 16) pu nu shaw yang num nu kading ri tai sai 17) pu shi shaw yang numshi ri tai ai 18) salum shaw yang awang naihpum tai ai 19) nra shaw yang lagri larang ngau kri tai sai 20) u sin shaw yang lung seng tai ai 21) shagri shaw yang lachyit shinglung tai sai 22) ma u shaw yang pawp chyut u tai ai 23) kan shaw yang gumgai tai pawt tai sai 24) hkyi shaw yang chyaukrit chyauya tai ai 25) shan shaw yang lamu ga sau tai wa ai 26) dinghku nra shaw yang n-ga dingkri dingpa tai wa ai. Sut u hpyin yang duhkra ladaw amyu myu byin tai wa ai hte lahta na lam ni byin tai wa sai. Dai hpang mung bai matut nna ginru ginsa yu hkrat wa yang mawen yang du ai shaloi mawe nhtu ni hpe dup lang chye wa sai nga ma ai. Bai matut nna lai yu wa yang wamung yang du yang shaloi mung wakau ka n-ga ni hpe galaw lang chye wa sai nga ai. Matut nna bai lai yu wa yang chyaraw yang du ai shaloi e lam pat yang jinghku galaw nna lai yu wa lu sai. Bai matut nna lai yu wa yang hkumawng mayang du ai shaloi mawe nhtu hte dan yang jahkring sha bai chyang wa ai majaw shingdim nan hkan ai hpyen ni nga ai raitim grai na sai nga nna hpyen luksuk ni bai htang wa ai nga ma ai. Dai hpang mung bai matut nna yu hkrat wa yang lamai yang du ai shaloi lamai hpun hpe dan yang hkraw wa loi langa yang du yang langa yau dat yang mung langa matsun prut pru loi ai hpe mu yang hpyen ni yawng gaw "Nlep wa sai" nga nna bai htang wa ai nga ma ai. Dai hpang bai matut nna yu hkrat wa yang bali yang du ai shaloi shaba lap labu bu chye wa sai nga ai. Bai matut nna yu hkrat wa yang mung htan bawng yang du ai shaloi htan bawng jahkraw hte shat shadu sha ngut jang shanhte gun ai sut u lagaw hte wan mang hpe ahpre da yang "Nam na u ni pyi ahpre sha hkang sai" nga nna hpyen luksuk hkan nang ai ni mung yawng bai nhtang wa ai nga ma ai. Dai hpang mung bai lai matut nna ginru ginsa yu hkrat wa yang ning un ning noi nai tu ai shara hta du yang ning un ning noi u ni hpe htu sha chye nna nai htu lu yang shingkraw krawda hku shadu sha ai ni gaw shawng lai lu nna krawdung hku shadu sha ai ni gaw hpang hkrat nna she lai lu ai nga ma ai. Bai matut nna lai yu wa yang ngau sat yang du kinret kinrat kinrat hkang du. Mali hpungnawn du, mali hpungnawn mali hpungnawn du yang nlung mahtan hta rap wa ai. Dawngtep hka du dawai ga du panghkai ga manje bum edidan kumdi dan munglang dan munglang hka rap hkaw ming hkyet du hkau tawk dumlawng na um ga mungyak dan lungsha yang n-yu ga mazup baw lapat hka hkau shadang du n-yaw hka pakan yang mali hka htawng ya ndai shara hta nlung nahtai hte nlung hte kum da ai sharaw mahtum hpe ya du hkra mu lu ai nga ma ai. Mali hka hta ndan matep daru hta rap yang nlung kabai bang nna rap wa ai nga ma ai. Ndai daru hta ya du hkra nlung bum ni dingren sha nga nga ai nga ma ai. Ndai daru lawu shang hka mazup kaw nai hkala pawt htu kau ai daw lawng dingga ya du hkra nga ai nga ma ai. Ndai shara hta nlung wakang taw ai sai hka daru tsap byi hkyet tsap grai ju ai majaw masawn jun nna tsap ningju hpe lu kau sai nga ma ai. Chyinglai hkyet du yang chyinglai sharaw ju ai hpe nlung mahtum kum nna lu kau sai nga ma ai. Hkinlum madeng hta mung ma kaji ni hpe hta sha ai ma sha galang kaba nga ai majaw ning ngun ning hkyeng bum na nai hkala pawt hpe htu kau nna ginru ginsa lam woi ai wa ma sha galang kaba hpe gap dat yang dangmang yang ngu ai shara de hkrat wa sai nga ai. Dai shara ni hta dai shaloi yu hkrat ang ai ginru ginsa la ni mu nna dai masha galang mang hpe hta ju sha kau sai nga ai. Ma sha galang kaba hpe gap ai wahpung gummawn gaw shi gap dat ai galang kaba tam sa du yang ju sha kau sai wan mang hkang hpe sha mu lu nna ka-un ai myit hte shaman hkindit da nna bai htang wa sai nga ai. Ndai shara hta jahku hkam kaba ai ati pawt ditlang bai jahku hkam pa ai dilap lap ai gala mati kaba langai mi tu ai mung nga ma ai. Dai gala mati kaba hpe ginru ginsa la ni gaw shawng lai ang ai ni ti lap di sha nna ti lap di sha htum ai hpang lai ang ai ni gaw ti pawt sha rai yang ti lap sha ai ni gaw "Ti lap pyi grai mu ai rai yang ti pawt mung grai mu na rai sai" nga tsun ai. Ti pawt sha ai ni mung "Ti pawt pyi ndai daram mu ai gaw ti lap mung grau mu na sai" nga nna tsun hkat ma ai da. Gala mati kaba di sha kau htum sai hpang de lai ang ai ni gaw yu sharu hte aw yu sharu htu sha yang yu sharu ni hprawn tawn ai ma sha galang nra hpe mu yang "Hkanhpa rai ang sai" ngu gun hkawm ai ni gaw sumgu yahtu ngu ai nat lu ai ni tai wa sai nga ma ai. Ma sha galang mati sha ai ni ti sawp ai nat lu ai ni tai wa sai mung nga ma ai. Ma sha galang kaba tai ai yan gaw Janga la hte Jangi jan yan rai ma ai. Ginru ginsa la ni bai matut nna yu hkrat wa yang sut hka bau hka nlung chyinghka shang hka daru ginru ginsa la ni gaw shapawng n-gun ja shingjawng nna shang hka mazup hta nlung kabai bang nna rap wa ai nga ai. Magawng utu ga ninghkram hka ngateng dingsa laja kawng htingga kabrim ningwawn daru da hka daru kumseng yang dawng ga ulu hka ulu hka shawn lawai hkyet lawai yang dumshawn ga kadaw kawng pangsau lamung dinghput wa kyit yang singgung wa yawn zinlum laidang majoi ding kye majoi shingra lung pu chyaihku majoi ga du sai nga ma ai. Ginru ginsa woi ai lamu la hpang sang gaw ginru ginsa la ni hpe matsun da ai lam gaw "Htaw chyaihku majoi doi wa sa salang ngoi wa sa salang a ga madat hpun sa chyalai nhpang sat nga nna nga mu" ngu matsun da sai nga ai. Dai hpang shi gaw myi man nsam ni lai nna wa sa salang tai nna chyaihku majoi de lung wa nga sai nga ai. Wa sa salang wa jun da ai shakawn shingdoi mung hpun sa chyalai nhpang tai nna tu wa sai. Shakawn gwi hpe mung hpun sa chyaloi nhpang kaw dun da sai nga ma ai. Ginru ginsa salang ni gaw wa sa salang hpe bai tam yu yang shi hpe sha bai mu lu ai nga ai. Ginru ginsa yu hkrat wa yang hpulum htu shan mung lawm ai nga ma ai. Hpulum htu shan gaw kangbang tsip ndi dawng tsip ni hpe yu nna lahkwi lalen hpyi shit nna labu palawng ni hpe da da chye wa sai nga ma ai. Dai zaw da da chye wa sai majaw nga hkra lap labu shaba lap labu ni gaw nbu sai nga ma ai. Ndai aten hta gaw ginru ginsa la ni gaw namsi namsaw hte dan nram mam hpung ngu hpung ngai mam ni hpe sha galaw lu galaw sha nga ai aten rai nga ai. Dai hpang chyaihku bum de lung yu yang grai sung ai grai kaba ai sut lu wulu langai mi hpe mu lu ma ai. Dai sut wulu hka nawng makau hta gaw hpri maku dap ai hpe mung mu ai. Dai hpri maku hpe wut wa aw wut hpang wa magam gaw hpri sha kum nga ngu shamying tsun ai. Hpri ju na matu nra wan n-ga hpe rai nchye galaw yang nam na chyahkyi shan nga hkyi ni hpe yu nna chye galaw sai nga ma ai. Nra wan n-ga hpe chye ju sai nga ai. Hpri bang na pada bunghkrawng hpe nchye galaw yang sum nawn si hpe yu nna chye galaw sai nga ma ai. Byem hpang wa magam hte kap lang kai yan gaw "Adup abyen gaw an chyoi ai" nga ai. Bai nna htep wa lahti gaw "Adup mung ngai chyoi ai ahkut mung ngai hproi ai" nga ai. Dai hpang lahkawn wa laka gaw sinli u hpe yu nna "Sumhting dum gaw ngai chye ai" nga ai. Sumhting laseng hpe galaw nchye yang lapawp la a rung yu nna galaw chye wa sai da. Sumhting ningnaw hpe galaw nchye yang shayi hpulum htu shan a manoi chyu dung yu nna galaw chye sai nga ma ai. Dai aten kaw nna gaw ndi hkra nhtu ningwa ni hpe mung lani hte lani galaw lang galaw lang chye wa sai nga ma ai. Dai hpang ginru ginsa woi ai wahpung gummawn gaw "Dam nram mam hte hpun ngu hpun ngai mam hte chyu sha gaw ginru ginsa lam gaw njing lu sai dai majaw mahtum mahta ga de mam hpyi sa mu" ngu tsun yang u hkru du gaw "Munaw shabrai jaw yang gaw ngai sa na" nga ai majaw ja ginrit jaw nna mahtum mahta mung de mam hpyi dat sa shangun dat sai. Mahtum mahta ga du yang mahtum mahta salang ni gaw "Hpa rai lung ai" ngu san yang "Ngai gaw ba hpe marit nna lung ai" nga tsun ai. "Ya nang kanang kaw manam yup na" ngu san yang "Nta kaw gaw lanyau hkrit ai mam dum de yup na" ngu tsun ai majaw mam dum de yup shangun yang shi kan hkru hkra chye sha la nna mungkan ga de bai yu hprawng wa sai nga ai. U hkru du chye sha la ai mam hpe gaw lamu nmat hpe matsing da nna chyahkyi shan nga hkang hta akret ahtu jat nna lup makoi da sai nga ma ai. U hkru du gaw "Dai mam hpe bai tam shaw sha na" ngu shi matsing da ai lamu nmat wa hkoi wa sai majaw shi makoi da ai mam hpe nlu shaw sha nna ya du hkra nam mali kata de u hkrudu mam ngu ai naw nga nga ai nga nna mung tsun hkai ma ai. Ya du hkra u hkru du a du kaw bat rai hkang ai gaw moi mahtum mahta ga de mam hpyi sa na nga nna jaw ai ja ginrit li ai hkang re ai nga ma ai. Chyaihku majoi kaw nga yang u hkru du hpe dat nna mam la sa shangun ai lam mung hpa nbyin mat wa sai majaw ginru ginsa woi ai wa gaw bai kalang mi mahtum mahta ga de mam la sa na matu nga gumra ni hte mam la sa na matsun ai hte maren mam gun la na matu sa du yang mahtum mahta du ni gaw mam amyu hkum hkra hte mam a shingnaw shingnan ni rai nga ai shinggyim masha ni hkai sha ai baw hpan hkum sumhpa hpe jaw dat sai nga ai. Dai shaloi mahtum mahta du ni numhtet dat ai gaw hkai lajang yang "Mam ni gaw nga loi hput pa daram jung gumra mai tsan daram bung ai nai mam rai ai lahkawng ning mung ningran ai masum ning mung ning hkran ai shalung nga mai ai" ngu nna mahtum mahta du ni numhtet dat ai. Shingrai nai mam gun nna bai nhtang yu wa yang sangen mare hta lai wa ai shaloi nga wuloi gaw share lu mayu ai nga na sangen mare de share lu shang yang nga wuloi lagaw buk bak gumra lagaw hkruk hkrak ai hpe sangen la wa na yang "Kadai ni rai hpabaw mi gun ai ni rai" ngu san ai shaloi "Mahtum mahta ga na mam gun la ai ni rai ga ai" ngu tsun yang mahtum mahta du ni gaw gara hku hku nna numhtet numra dat ai lam san wa yang "Hkai sha ai shaloi shata shi hta ngai nga wuloi hput ba daram jung gumra mai tsan daram bung lahkawng masum ning mung ningran shalung nga mai ai" ngu num htet dat ai lam hpe tsun dan yang sangen ala gaw "Dai gaw mazut makran mam lawm ai ngai a mai tsan daram bung wa lagaw daram jung ai mam gaw sha tim mung grai mu ai dut yang mung grai hpu ai manu lu ai. Dai bai shaloi mam gaw shata masum hta ngai nna jahti ma ni gaw shata mali manga hta ngai ai rai ra ai" ngu nna sangen e la wa matsun dat sai nga ma ai. Dai mam ni hpe hkranghku majoi ga de du wa nna hkai lajang yu yang sangen ala wa matsun ai hte maren sha byin pru wa ai majaw ya du hkra shinggyim masha ni gaw sangen hpe mu ai shaloi shi a mai tsan hpe tawk di kau ya ya rai ai nga ma ai. Dai hpang wa sa salang wa dai gaw ginru ginsa la ni hpe "Sut u garan ai du hkra ladaw hpe mdat nna singrap hpang yi ngu ai hkyen nna hkai lu hkai sha nna nga nga mu" ngu nna matsun da sai. Yi hkyen ngut nna yi hkran lam yi hkran hkraw yang nat, nat ngut nna yi sawm yi wa gap mam ting tsing magang rai nna galaw lu galaw sha nna nga sa wa na matu ginru ginsa woi ai la gaw ginru ginsa la ni hpe matsun da sai nga ma ai. Dai hpang shingra wahpang yi hta wahkum ru law law ru ai wa wahkum si gaw langai sha noi ai hpe wa sa salang wa hpe tsun dan yang "Dai wahkum si kaba gaw sut wahkum ngu ai re dai sut wahkum hpe ga yang shawng la wa da ai nai mam hkai nmai ni gaw law she law wa chye ai" ngu nna tsun dan sai. Kaja wa she dai sut wahkum hpe ga dat yang ga dat ai shaloi shawng de la tawn da lu sai nai mam hkai nmai ni gaw law she law wa sai nga ma ai. Dai shingra hpang yi hpe hpulum htu shan gaw yi pun bai htu nna nai wahkum ni hpe hkum hkra hkai lajang da ai. Shing rai hkai lajang sumli nga yang pu pu si si nna nai ni mung tu kaba wa nga ai. Ndai zawn nai wahkum ni hpe nam na du dumsi ni di sha htu sha kau ya ai hpe hpulum htu shan gaw du dumsi ni di sha htu sha ya ai hpe nchye nna nai nhpang makau hta hkret kaw shaga nga ai hpe "Nang ngai a nai wahkum sha ya ai ngu" rim nna gyit sharen da sai nga ma ai. Dai shaloi hkret kaw gaw hpulum htu shan hpe "Na a nai wahkum ngai nsha ya ai na a nai wahkum ni hpe sha ya ai chye na matu yi hprawt shingnawm dan nna yu u" ngu yang kaja wa shingnawm dan ai shaloi du dumsi lam mahkrun lam hpe mu ai shaloi shi kyet da ai shing kyet raw nna du dumsi lam kaw hkam da ai shaloi hpang jahpawt sa yu yang du kaba langai mi lu noi nga ai hpe raw la nna sat sha na rai sai. E du gaw "Ngai sat sha kau na" ngu tsun ai shaloi du gaw "Hpulum htu shan e nang gaw ngai hpe sat sha yang gaw shat ma langai lahkawng sha mu na nanhte hpe ngai e prat tup jaw lup akyu nga ai lam hpe ngai tsun dan na" ngu yang "Tsun dan rit" nga ai shaloi du kaba gaw "Ya ngai nam mali de hkawm sa yang lap hprut di tawn ai hpe da nna pawt kaut di kawa da ai namlap ni hpe jahkraw la nna n-gu shadung htu nna gayau da ai hpe mali manga ya din yang nhkyeng n-gu shadu nna dai matsi shadung mun nna manga kru ya din yang sha chyam yu u. Mu ma dwi ta nga ai tsa chyaru byin tai wa na re" ngu nna du gaw hpulum htu shan hpe matsun da sai. Hpulum htu shan mung du matsun ai hte maren lap hprut di nna tawn da ai namlap hpe tawn da nna pawt kaut rai kawa da ai hpun kaw na lap ni hpe di la lahkawn nna jahkraw da nhtawm n-gu shadung htu nna gayau da nhtawm matsi shadung hpe nhkyeng n-gu shadu nna shadung hpe gayau da ai hpang mali manga ya din yang lu sha chyam yu ai shaloi ahkri nga lu nmai sha n-ai nga ai majaw hpulum htu shan gaw masin pawt nna du kaba ni rawng nga ai ga ninghkrun ntsa e sa tsap nna "Du na du hkying ni e pru yu marit law npru na nga yang gaw hku mahka kaw wan hkut hte wan awak bang nna sat sa-ap kau na lo" ngu tsun jahtau marawn dat yang du nan sa pru wa yang "Nang tsun ai dwi ta mu ma nga ai tsa chyaru byin ai nga nna tsun ai nang tsun ai hte maren ngai galaw yu sai nmai ai. Lu nmai sha n-ai ahkri sha nga ai" ngu tsun yang shaloi du gaw "Kaning rai ai mi hta la nna galaw ai rai kun" ngu hpulum htu shan hpe bai san yu yang hpulum htu shan gaw "Nang tsun ai hte maren lap hprut re ai di da ai namlap hpe la nna pawt kaut rai kawa da ai namlap hpe tawn da nna ngu nna galaw yang lu nmai ai sha n-ai ai" ngu bai tsun ai shaloi du gaw "E hpulum htu shan e nang gaw shinggyim na rai na le ai re dai hku nre lap hprut re dai hpe tawn da nna pawt kaut re kawa da ai hpe di la nna she galaw u ngu ai" ngu nna du gaw bai galau tsun ai hte maren hpulum htu shan mung du bai galau tsun ai hte galaw yu yang kaja wa sha dwi ta mu ma nga nna tsa chyaru byin wa sai nga ma ai. Dai majaw tsa chyaru byin wa ai lam gaw chyaihku majoi kaw nga ai aten hta she tsa chyaru ngu ai wa du ni matsun nna byin lu sai nga ma ai. Tsa chyaru ngu ai hpe nam na du ni matsun ai majaw chyaihku majoi ga kaw nga yang galaw lu galaw sha chye wa sai nga ma ai. Dai hta n-ga da chyaihku majoi ga e nga yang htingra hpang nta hpe mung gap rawng nga hpang sai nga ma ai. Dum nta nnan hpe gap ngut sai hpang dum nta nnan hpe moi moi lachya la na matu mahtum mahta du ni ra ai hku nang mahtum mahta du ni na ra na hku dumsa chye ai masha hpe lata la na hku langai hte langai hpe dumsa shangun yu ai nga ma ai. 1) Shingra wa hka nawng hpe dumsa shangun yang shingra wa hka nawng gaw dumsa ai gaw da "Ji myit mung ngai chyoi nat myit hpe mung ngai hproi shawng de na ni mung ngai chyoi a hpang de na ni mung ngai hproi a" nga nna dumsa ai majaw "Nang gaw dumsa gaw nre ningwawt wawt u" ngu nna ningwawt tai wa sai. 2) Hpulum htu shan hpe bai dumsa shangun yang "Ngai hpulum htu shan dumsa ai gaw da ngai hpulum htu shan shayi lapyan ka-ang hte mung nga i la shan rawng ai hte mung ngai sha" nga nna dumsa ai majaw "Nang mung ru lum tai nna ka-ang garep pa lahkawng sha u shan rawng ai dang bau dang kang shan hpe mung num sha shan rai u ga" ngu nna masat da ya sai. 3) hta makrim gam du bu ngu ai wa dumsa ai. Ndai makrim gam du bu gaw dumsa ai gaw "Du a du bu a bu dubawp shan ngai la dupau shan mung ngai sha na" nga nna dumsa ai majaw "Nang mung dumsa gaw nbyin ai hkinjawng tai nna dubawp shan sha u" ngu matsun da sai nga ma ai. 4) hta ginru wa laran wa bai dumsa ai gaw "Jahkrim shan gaw ngai la n-gun shan hte gaw ngai sha" nga nna dumsa ai majaw "Nang mung shanju shan hkyen la tai nna sha u" ngu matsun da sai. 5) Marun ningru nawng dumsa ai gaw "Hpaw nga ai wawng mahku ga ndai gaw lainaw hpun tsin hte nshamawt bum chyinghka hpun law hpun lap ni hte mung ngasawt mahtum ga wang mahta ga hkrang u ga lo. Ngai gaw jahkrai gaida nlata lu su nga mai ai ni hpe mung nginghka mung ngare shaprai mung nkashe" nga nna dumsa ai majaw marun maru nawng hpe gaw nga jahkraw hpe jahkrung shatai pinring shingdoi jahkraw hpe katsing shatai nna alap lap shangun dumsa kaba madung shatai da sai nga ma ai. Hkranghku majoi makau mayang nga ai ni yawng gaw marun ningru nawng gaw dumsa ai hkring htawng hpe lang nna dumsa ai nga ma ai. Dumsa ning gring ai shabrai gwi rung wa rung hkan hpa u rung hkan hpa amyu ni hpe jaw ai nga ma ai. Shing rai chyaihku majoi hta nga yang lam shagu hta chye chyang jing ring wa sai majaw ginru ginsa woi ai la wa gaw "Ya gaw nanhte shinggyim masha ni gaw chye chyang myi hpaw wa sai majaw Jinghpaw amyu ni nga nna nga nga mu" ngu nna ginru ginsa woi ai wa matsun da sai nga ma ai. Shingteng amying da ningtan amying la ai lam. Ginru ginsa woi ai wa matsun da ai hte maren hkranghku hpungnawn de sa nna nimtin numraw lakang gau lai yang numtin numraw lakang manyen kashawt yang langai hte langai tsun shaga sa wa ai lam kaga ga nga nna tsun shaga sa wa ai nga ma ai. 1) Numtin numrawng lakang manyen kashawt yang wa li nga ai wa gaw marip amyu a kaji tai sai. 2) Bai langai mi lai kashawt yang tsun ai wa gaw wa goi pang nga nna tsun ai wa gaw maran wa yipang tai wa sai. 3) Dai hpang bai langai mi lai kashawt yang tsun ai gaw wagoi hkum nga tsun ai wa gaw nhkum amyu ni a kaji tai sai. 4) Dai hpang bai langai mi lai kashawt yang tsun ai gaw wagoi krang nga ai wa mung lahtaw amyu ni a kaji tai wa sai nga ma ai. Dai hpang bai langai mi lai kashawt yang wagoi hpai nga ai wa gaw magawng amyu ni tai wa sai nga ma ai. Hpang jahtum hta na na machyi nna hpai lai ai la wa gaw lahpai daina la ngu shamying nna lahpai amyu ni a kaji tai wa sai nga ma ai. Ndai hku langai hte langai gaw amying la hkat nna nga pra sa wa masai nga ma ai.
Origination date 2017-02-03
Origination date free form
Archive link https://catalog.paradisec.org.au/repository/KK1/0422
URL
Collector
Keita Kurabe
Find similar
Countries
Myanmar - MM
To view related information on a country, click its name
Language as given Jinghpaw
Subject language(s)
Jingpho - kac
To view related information on a language, click its name
Content language(s)
Jingpho - kac
To view related information on a language, click its name
Dialect Standard Jinghpaw
Region / village Northern Myanmar
Originating university Tokyo University of Foreign Studies
Operator
Data Categories primary text
Data Types Sound
Discourse type narrative
Roles Keita Kurabe : depositor
L. Tu Awng : speaker
DOI 10.4225/72/59889556cd123
Cite as Keita Kurabe (collector), Keita Kurabe (depositor), L. Tu Awng (speaker), 2017. Mahtum mahta kaw nna ginru ginsa yu hkrat sa wa ai lam (The Kachin migration). EAF+XML/MPEG/VND.WAV. KK1-0422 at catalog.paradisec.org.au. https://dx.doi.org/10.4225/72/59889556cd123
Content Files (3)
Filename Type File size Duration File access
KK1-0422-A.eaf application/eaf+xml 125 KB
KK1-0422-A.mp3 audio/mpeg 34.6 MB 00:37:54.900
KK1-0422-A.wav audio/vnd.wav 1.22 GB 00:37:54.889
3 files -- 1.25 GB -- --

Show 10 Show 50 Show all 3

Collection Information
Collection ID KK1
Collection title Kachin folktales told in Jinghpaw
Description Recordings of Kachin folktales and related narratives in Jinghpaw. These materials were collected by Keita Kurabe, Gumtung Lu Awng, Sumdu Ja Seng Roi, Hpauhkum Htu Bu, Labang Tu La, Gumtung Htu Nan, and Lashi Seng Nan as part of community-based collaborative fieldwork in northern Myanmar. A total of 2,491 stories with 2,481 ELAN files, 2,481 transcriptions, and 1,437 translations are currently available (November 23, 2024). Transcriptions were contributed by Gumtung Lu Awng, Pausa La Ring, Galang Lu Hkawng, Sumdu Ja Seng Roi, Hpauhkum Htu Bu, and Keita Kurabe. Stories were translated by Nbanpa Rita Seng Mai, Sumlut Gun Mai, Lazing Htoi San, Maran Seng Pan, Dumdaw Mike Tu Awng, Nhkum Htoi Awng, and Keita Kurabe.

Animated stories are available at:

https://catalog.paradisec.org.au/collections/KK3
https://www.youtube.com/@kachinfolktales
https://www.facebook.com/KachinStories

Other Kachin culture and history are available at:

https://catalog.paradisec.org.au/collections/KK2

Our research was made possible under the support of JSPS KAKENHI Grant Number JP17H04523, JP20K13024, JP20H01256, JP24K03887, Linguistic Dynamics Science 3 (LingDy3) from Research Institute for Languages and Cultures of Asia and Africa (ILCAA), Tokyo University of Foreign Studies (TUFS), and JSPS Program for Advancing Strategic International Networks to Accelerate the Circulation of Talented Researchers "A collaborative network for usage-based research on lesser-studied languages."
Countries
Myanmar - MM
To view related information on a country, click its name
Languages
Jingpho - kac
To view related information on a language, click its name
Access Information
Edit access Nick Thieberger
Keita Kurabe
View/Download access
Data access conditions Open (subject to agreeing to PDSC access conditions)
Data access narrative
Metadata
RO-Crate Metadata
Comments

Must be logged in to comment

No comments found