| Description |
Transcription (Htu Bu)
Anhte chyurum wunpawng sha ni moi jiwoi jiwa prat kaw na lang hkrat hkai hkrat wa ai lam nambat 4 du hkra nga ai, dai gaw hpa baw re ta nga yang nambat 1 ginru ginsa, 2 maumwi mausa, 3 labau, 4 htunghkying ndai ni gaw ga kanu re. Ginru ginsa ngu gaw chyurum wunpawng ni nga sa pra hkrat wa ai hkrun lam hpe tsun ai re. Maumwi mausa ngu gaw shaning hkying2000 ning a lahta de na wa la ni magrau grang ai ni, samnang ai n gun ja marai rawng ai ni, tsun lai galaw lai wa ai hpe ban hte ban, prat hte prat hkai hti da hkrat wa ai hpe maumwi ngu ai re. Labau ngu ai gaw amyu myu ngai ai, mung labau, hka labau, mare labau, masha labau, nang mung na labau, ngai mung nye labau re. Htunghkying ngu ai mung ga kanu re, mawn sumli ai ka manawt ai, jaw lu jaw sha ai shachyen shaga aim numjaw num ya ai numwa numsa ai ni yawng gaw htunghkying hta lawm ai hkrai re. Ndai htunghkying a lachyum gaw nambat 1 lang ai gaw numjaw numya ai kaw lang ai re. Anhte wunpawng sha ni moi prat num la ai ngu ai amyu 4 nga ai ngu hpe chye lu ai. 1, num hprawn la ai ngu nga ai. Loi mi zai ai hku tsun a ga nga yang num lagu ai ngu re. 1 gaw shayi sha dai yup ai yup ra kaw dama la wa n ba yan rai rai gumhpraw 100 rai rai tawn da na hprawn mat wa ai dai gaw yup ra mahtan nga na shamying ai. Dai yupra mahtan tawn da ai lachyum gaw hpang jahpawt kanu kawa ni rawt yang n mau na matu ndai dama la langai ngai a hpang hkan mat ai re ngu asan sha chye na matu tawn da ai hpe yup ra mahtan ngu ai re. Nambat 2 salang n hprek ngu nga ai. Salang n hprek ngu ai a lachyum gaw dai shayi sha nga ai nta htingbu nau ntsan ai kaw na salang 2 hpe dum dum hte hte nga na hpaga 2 ram tawn da jaw na woi mat wa ai dai gaw salang n hprek ngu ai re. Dai salang ni kaw na dai shayi sha kanu kawa ni hpe tsun dan, yat shanhte dama ni jin ai ten nga yang hkan hpyi sha mu, ngu na tsun dan ai salang n hprek re. Bai nambat 3 gaw num woi la ai ngu nga ai. Num woi la ai ngu gaw dai shayi sha jan, shi dama la wa hte kanawn mazum ai hta lai, pyaw lai ai majaw shinggyin hkum rai wa ai majaw, shinggyin hkum ngu ai gaw na-um nasin re wa ai hpe ngu ai re. Dai mayu dama 2 maga, makin jinghku dingbu dingpyen galai n chye ndan ai yang lawan woi la mu, ngu na n ri n htu shaman ya ai lam, hpu ja lu lawt ai hte hte bang da na sa la shangun ai dai hpe num woi la ai ngu re. Num sharawt la ai ngu gaw kaba htum ai re sai, wunpawng sha ni a ri n htu hte shaman ya nna hpakap n ba jahpye nna shakawng aw hte sharawt dat ya ai ngu re, dai ni sharawt lam hpan a dama nta ni kawn hpang shani hkrungran la ai dai gaw num sharawt la ai ngu re. Kaba htum re ndai gaw wunpawng sha ni a numwawn numla ai hta na hkyik dik kaba dik htum re sai. |
