| Description |
Transcription (La Ring)
Sara hte hkrum ai aten hta ngai na mabyin hte hpung magam lam ni hpe tsun dan na ahkaw hkang lu la ai majaw Karai Kasang a chyeju hpe shakawn ai law. Ngai gaw bumga Nlaw uma ngu ai Sumprabum ginwang kata na mare kaw shangai wa ai re. Ngai naw kaji nga yang nye a kanu kawa ni si shakram da nna ngai gaw asak shi lahkawng ning du ai shaloi nang Myitkyina Shatapru kaw manau manau ai kaw sa lawm ai lata daini du hkra nga ai re. Dai shawng shawng kaw na anhte a mayu amyu ni Mayan ga de sa nga ai katsa ya nang kaw sumla nga ai ndai ni shawng sa wa ai majaw dai manau poi ngut ai shaloi dai mayu nta kaw sa nga kaba nna jawng lung rai na ya jawng hpe gaw nam kahtawng kaw na sharin wa ai. Ngai gaw tsang matsat du hkra sha sharin nna tsang matsat pyi n-awng ai machyi kaba hkrum nna hkring mat nna hpang jahtum gaw ndai bungli galaw na matu bungli amyu masum ngai shawk da ai. Langai gaw Taw Gaung, lahkawng gaw Taung Oak masum gaw Pyan-kya-yay rung chyare ndai ni hpe ngai shawk da ai shaloi ma hkra ngai hpe hkap la ai shaga ma ai. Rai yang dan re gara galaw na kun ngu myit nga yang Kap Lang mare kaw hpung ni hpaw da ai laika jawng "Sara nnga ai nang naw shakut nu" nga na kasa masum hpungtau ni masum du nna dai ni bai jat rai jang amu mali ngai hpe shaga ai. Dai shaloi ngai gaw shana yup akyu hpyi nna "Gara mahtang ngai galaw na kun" Taw Gaung galaw yu Taung Oak galaw yu e rung chyare galaw yu gara galaw yu tim e nye myit hta e "Kaga bungli ni galaw yang gaw tinang amyu a matu nau wa akyu nnga ai tinang a matu sha re" ngu hku myit la nna hpang jahtum e gaw "Mare buga na kashu kasha langai lahkawng hpe hpaji chye hkra sharin ya ai gaw grau kaja ai" ngu nna myit la ai majaw ngai mare de wa nna jawng sara hpe mahtang galaw ai. Jawng sara laning mi galaw nga yang ndai nawku woi na akyu hpyi na hta sara wa dai kaw woi wo ra kaw woi nga re wa shaloi ngai dai hte seng na ngai hta atsam nnga re majaw hpang jahtum e gaw "E nanhte ngai hpe e hpung magam hta shangun na rai yang gaw chyum jawng naw lung la shangun mi" ngu na hkying mi jahku tsa manga shi jahku ning hta ngai Mayan mare kaw na La committee kaw na karum ai gumhpraw hte Sammung ginwang Kutkai mare kaw hpaw da ai chyum laika jawng de e manga shi jahku ning kaw na lung ai. Kru shi langai ning kaw ngut nna nang Mayan mare a shangun ma hku nna Kawa Yang ngu ai mare kaw e bungli sa gun nga ai. Dai kaw du nna hpung woi nga ai aten hta shanglawt ni hte mung kanawn ra Myen ni hte mung kanawn ra rai na gara de mung e sa kanawn hkrup ai majaw hpang jahtum e gaw ngai hpe se-hkun-thit ngu ai (17/1) puk ma hte rim la nna Myitkyina thee-thant ngu ai kaw masum ning tup nga ai. Hpa tara mung njeyang re majaw ngai gaw asar-ngat-sanda-pya nna bai hpyi la ai shaloi gaw htaung-gyi-chuk de se-hkun-thit ngu na bai Myitkyina htaung-gyi de bai tawn da ma ai. Dai kaw ngai sa galaw ai gaw ndai manang ni hpe chyum laika sharin ai lam, laika nchye ai ni hpe laika sharin ai lam ni hku na grai rai na htawng kata kaw sa shakut ai. Hpung masha ni hpe hkalup hkam ya ai marai hkun manga tup hpe mung hkalup hkam la hkra htawng kaw e woi lajang ai. Ning rai na pru wa ai hte rau gaw ndai Mayan mare a woi awn nga ai Kawa Yang Gala kawng ngu ai mare aw e Sar Maw ngu ai mare de bai htawt nna Sar Maw mare kaw sanit ning hpung woi sara galaw ai. Nawku jawng ni woi gap ai hpung masha ni hpe sharin achyin ai lam ni hta manang ni hta loimi grau grau shakut ai baw re majaw gaw ngai hpe Htingnai ginwang hta mung masum lang tup ningbaw tawn da rai na dai kaw na bai ndai Htingnai ginwang ngu ai hpe shabyin ga ngu na shawng e gaw Mayan mare kaw na woi ai kahtawng sha re ai. Raitim mung ginwang byin mai sai nga na manang ni yawng myit hkrum ai majaw Htingnai ginwang ngu ai hpe anhte KBC de bai hpyi ai shaloi gaw hkying mi jahku tsa sanit shi masum ning hta Kangdau Yang kaw ang ai zuphpawng kaw nna Htingnai ginwang ngu ai anhte hpe masat ya ma ai. Ndai masat la ngut ai hpang e Htingnai ginwang hpe woi awn ai wa re majaw gaw ngai hpe mahtang amu madu kaba shara jaw nna Htingnai ginwang amu hta shi masum ning tup ngai woi awn nna kahtawng ni law law hta e e jawng nnga ai kaw jawng ni woi galaw ai sara nnga ai kaw sara ni woi tam tawn da rai na ndai ginwang kata kaw ndai ram ram shamu shamawt nga ai. Dai shaloi e ndai KBC de mung ngai hpe shaga nna La hpa-awn da rai na arai kabu gara shiga hpa-awn da rai na ngai hpe jai lang wa ai. Dai kaw e ya ndai kaw Hopin ngu ai kaw shawng ningnan na hpung up galaw ai Sara Tauba Zau Seng ngu ai wa woi awn nga ai kaw na shi akajawng sha si mat ai majaw ndai kaw sara bai ra taw ai. Shaloi gaw kaga de na sara ni shaga bang yang gaw ndai ginwang a lam nchye ai re majaw ngai gaw nang kaw mi kaw na ndai Htingnai ginwang hpe woi awn ai wa re majaw ngai hpe bai shaga nna hkying mi jahku tsa e jahku shi masum ning kaw nna ndai mare kaw ngai hpe shaga bang da ngai mung dai hpe hkap la rai na ya du hkra ndai kaw nga ai. Ya ning rai na sa nga ai hte rau gaw ya mi na nawku jawng gaw le wanleng mahkrai makau kaw re majaw grai garu ai akyu hpyi nmai ai re majaw gaw ndai shara de bai htawt nna ya mu nga ai ndai gaw gap da ai htingnu ni nawku htingnu ni hte ndai a gawknu ni ngai woi galaw mat wa ai gaw ya daini du hkra ndai hku galaw nga ai re. Rai na ndai kaw shawng e hpung masha nnga ai hpe grau nna Karai Kasang hta akyu hpyi ap ya ai gaw Sara Kaba Kun Le mung ngu Hawng Hkawng mung ngu re ai wa woi kyu hpyi ya nna Karai Kasang gaw shi a kyu hpyi ai hte maren madat mara nna ya daini ndai Hopin kaw gaw hpung htinggaw gaw mali tsa jan re ai hta n-ga anhte nawku hpung nbung ai kaga hpung ni mung grai grai law sai. Shanglawt hkristan hpung, ndai kaw Anglican hpung, AG hpung, Madung hpung, Hkristu hpung nau na hpung law law rai na ya ndai kaw anhte Wunpawng sha ni Jinghpaw ni grai law wa ai gaw Karai Kasang a chyeju hte rai nga ai. Maga mi hku gaw nam kahtawng de nga ai ni shanglawt hte matut ai ngu na Myen ni e gau shinggyin nna law wa ai mung rai nga ai. E ma hkra kaja ai hku anhte myit la ga nga jang gaw anhte nam de chyu nga ai ni hpe ndai zawn rai na myo de e Myen hpyen la hpung hku mi raitim ndai hku myo a nga ra ai lam ni hta anhte amyu sha ni hpe ndai hku na woi bang wa ai Karai Kasang a lajang ai lam myu mi re ngu na anhte dai hku mu ga ai. Ya ndai makau grupyin hta mi gaw ndai makau mayan gaw Taung Chauk gaw Zi Zau Naw ngu ai wa woi awn ai. Shi a ndai pa mahkra gaw Zi Zau Naw gaw Taung Chauk galaw ai hku re. Ndai maga de Wabaw ni woi awn ai hku re. Shingrai na shara shagu anhte Jinghpaw ni kahtawng law law nga ai hpe daini ndai zawn myo de wanleng lam de gawt da nna daini gaw nam de gaw nau nnga mat wa ai re hku rai nga. Raitim mung nnga daw ngu yang hkauhting hkauna lu ai ni galaw lu galaw sha ai hku na gaw nga ma ai. Dai ni yawng mung gaw e ndai de daini majan mahpan a majaw atsawm rai na shawng na zawn rai na galaw lu galaw sha ai hta yak hkak ai lam nga ai. Raitim ya ndai kaw gaw mi gaw anhte a amyu ni gaw hpaga ga ai kaga lam nre sha ndai namhpam lu sha ngu ai hte dut lu dut sha nna hpaga ga dai hku nna nga ai law ai raitim daini gaw "Pat Jasan" ngu ai gabaw hte ndai malu masha dut lu dut sha ai ni yawng hpe e jahkring na matu aja wa hku na mung angwi hku na mung tsun sharin shaga ai majaw daini gaw ndai nanghpam lu sha ka ni ndai ni hpe e tawn kau ai hte law wa sai. Rai na ya anhte a hpaga dingga gaw langai gaw hkauhting hkauna galaw ai, lahkawng gaw dut lu dut sha ai magam bungli galaw ai, masum gaw ja htu ai seng htu ai ndai hku na anhte a ndai kaw e lam ka-ang ang ai ndai Hpakant de lung yang mung aloi sha le Nam Hkyi maw de sa yang mung aloi sha. Ya nang Gawkgwi maga de ja maw ndai hku nna mung anhte a ginra ni hta e Karai Kasang a chyeju hte hpaga dingga galaw mai ai shara ni ndai hku na anhte hkam la ai. Ya anhte a masha ni nkau mi shanglawt ni kaw na hkawt maisak hpun hpe dut nna Miwa mung de dut sha ai. Ndai hku na anhte a buga ni hta hpun ni nnga mat wa ai majaw ndai aten ladaw hta hkan nna du hkra ladaw ngu ai shai mat wa ai lam ni mung anhte hta hkrum ga ai. Dai zawn re ai yak hkak lam ni law law a lapran kaw daini gaw hkauhting hkauna galaw ai. Moi gaw kumshu sun mung galaw ai ya gaw kumshu gaw law law ngalaw sai. Anhte a shara ni hta she htaw Miwa ni sa nna langu sun galaw ai, anhte mahtang she shanhte kaw nchyang tai nna tam sha ai daw ni mung anhte hta daini gaw grai byin wa sai hku re ya anhte a masha ni raitim mung Karai Kasang a chyeju hte daini gaw anhte laili laika grai chye wa sai le. Janmau lu ai masha grai law wa sai e ndai tsi sara galaw ai ni jawng sara galaw ai ni hpyen du hpyen la galaw ai ni mung anhte hta dai ni grai law wa sai. Ning rai na anhte a nga ginra hta hkan nna anhte seng ang ai atsuya kaw anhte Wunpawng sha ni lu la ang ai ahkaw ahkang ni hpe mung ya anhte hpyi ding yang rai na ya myit nga ma ai bawng nga ma ai atsuya hku na mung gara hku anhte amyu hpe gara hku di na hpyi ai hte maren jaw na kun shing nrai njaw na kun gaw ya rai nchye ai ten re. Dai majaw ya anhte a shara hta hkan nna anhte gaw ya laili laika hpaji hpe tinang a amyu ga hku ma ya sharin ra ai. Amyu sha jawng ngu ma hpaw ai, ma shalet jawng ngu hpe ma hpaw ai. Rai na ndai myu sha jawng nga ni gaw Myen hte seng ai laika ni hpe nlang ai anhte Jinghpaw laika sha sharin ai bai na English laika sharin ai. Bai na htung hkying hte seng ai lam ni hpe sharin ya ai hku na ya ndai gaw anhte a lagaw hte anhte tsap ai bungli hku na anhte galaw nga ai. Rai na ya ndai shara hta hkan nna daini byin ai mabyin masa ni gaw anhte gaw ndai nanghpam ngu ai hpe grai naw ndai atsuya hku na mung grau grau sha na hku dut shabra ai bungli hku nna anhte hpe galaw nga ai. Ndai gaw anhte a sai garan ai baw Maru Lashi Zi Nung Rawang nga anhte hta amyu ni nga ai dai hpe mung anhte hta nhkrum mat hkra anhte hta e shai wa hkra anhte hpe garan ai atsuya bungli mung dai hku nga ai. Dai hpe chye lu ai dai majaw mung daini anhte shang lawt ngu ai hpaw nna laknak hte gasat ra wa ai gaw dai zawn re anhte hpe amyu myu galaw nga ai majaw anhte hta shada garan ai Jinghpaw hkrai raitim yu mi gaw KBC ngu ai langai sha nga ai ya gaw Madung hpung ngu ai ma nga wa ai. Ndai zawn rai na shada da nru nra hpung hta mung garan ai, amyu hku na mung garan ai hpa lam hta mung anhte ya yak ai gaw dai. Dai ni mung dai tinang a atsuya wa dai hku tsun jang gaw Maru wa mung Maru hku nga mayu Lashi wa mung Lashi hku nga mayu wo dan rai na anhte Jinghpaw ni hta amyu kade nga yang kade hku na shada nram ai le e gali galaw byin ai. E ning re ni gaw ya ngai hku nna gaw dai hku mu mada ai lam hpe e daini nang hpe tsun dan ai hku re. Kaga lam ni ndai lam ni gaw anhte hku na gaw dep tim mung nmai tsun ai lam ni mung nga ai le i ning re lam ni nga ai ngu. E ya ndai Htingnai ngu ai byin wa ai gaw anhte gaw mi kaw na nang kaw Jinghpaw ni nga ai le Namsi Awng Kahta ndai daw de nga ai. Dai ni hpe Htingnai ngu na shamying ai gaw ya mi anhte hpung hpaw wa ai shaloi mung mi comittee salang galaw ai ni gaw "Mayan ginwang ngu ga, Namati ginwang ngu ga, Mogaung ginwang ngu ga, e Monyin ginwang ngu ga" nga ginwang mying ndai mare mying la nna shamying hkyen ai. Dai hpe ngai gaw "E ndai de gaw moi anhte kaji kawa ni bum ga kaw na "Le yawn htingnai ga de sa ga ngu ai Htingnai ngu ai shara she re ndai gaw dai majaw Htingnai ginwang ngu yang nmai ai i" ngu ngai tsun ai shaloi "Ara law rai sai law" nga na daini Htingnai ginwang ngu ai hpe woi shamying ai mung ngai re, Htingnai ginwang woi de wa ai kaw atsam dat nna woi lawm ai mung ngai re. Shing rai na daini nang kanam wa rai nga ndai rai jang gaw anhte a makam masham lam hku na gaw mai tsun dan ai lam ni nga ai raitim kaga lam gaw ngai nau ndep nhkap ai. Ya ndai de nga ai ni wo ra Laja ni ngu ai nga ai wo ra kahtawng kaw dai myit su langai grai shi gaw nang kaw na nga ai ding sa re. Dai majaw shi hte mung hkrum yu rai u yaw. Htingnai ginwang kaw gara kahtawng buga ni lawm ai kun, Hopin lawm ai? Htingnai ginwang i le Kahta du hkra rai nga le. Kahta kaw nna Naba kaw na nang de, htawra de rai jang Mayan kaw na nang de, wo de rai jang gaw hpabaw i Dum Bung, Dum Bung kaw na nang de, nang de e rai jang gaw Nam Sheng nang de dai hte lawm ai. Ndai de rai jang gaw le Mali hka kanoi du hkra ndai hku nga ai, ndai hte hpe Htingnai ginwang ngu ai rai a. Lahta de gaw Mayan, lawu de gaw Naba Kahta ndai kaw du hkra re. Myitkyina nlawm ai i? Myitkyina gaw anhte pru ai rai nga mi gaw Myitkyina ginwang kaw nga ai anhte pru wa ai. E dai hku re Myitkyina nlawm ai wo ra de anhte Kamaing maga de Kamaing de nlawm ai. Nam Sheng ngu kaw jahtum ai wo ra maga de bai rai jang gaw e Dum Bung ngu ai kaw jahtum ai. Dai kaw na nang de nang de ndai de rai jang gaw ya htaw, htaw Hpakant lam de rai jang gaw ndai Na Mawn ngu ai ndai Nawng Lut Nawng Ing ndai mayan na ni yawng re. Dai kaw na gaw ndai de gaw ya law malawng gaw nang kaw pru wa sai wo de nam de nau nnga sai. Dai hte hpe Htingnai ngu ai re anhte ginwang hku Hopin zawn re buga hku nga jang gaw hkun sanit nga ai. Mare hkun sanit e dai kaw na ginwang gaw anhte Htingnai ginwang gaw ya tsun ai hte rai sai. Htingnai de shawng nnan sa ai gaw kadai kun? E Htingnai maga de gara kaw na sa wa ai kun? Htaw bumga na yu wa ai re e bum ga na le ra de salang wa galaw ai le Udi bum ngu ai ni wo ra Magwi Chyai nga ai ni moi bum ga kaw na yu wa nna salang galaw na nga ai dai ni hpe Htingnai ngu shamying la ai re. Um dai hku ya ngai tsun dan na gaw dai hte rai sai. Palawng mung shai ai i? Aw dai nga ai re ya dai gaw hpawtni madun na yaw ya ngai na nta madu jan wo wa lawng de sa mat sai. E e wa yaw ai e. Chyeju kaba sai. |
