| Description |
Moi shawng de kahtawng langai mi kaw e hpyi grai ja ai la langai mi nga ai da. Yawng hkra shi hpe hkrit ai da, yawng hkra shi hpe hkrit ai, yawng hkra shi hpe hkrit ai da. Shi gaw grai shabang kaba rai mat sai da law, hpyi nau ja na kadai mung hkrit rai num mung n la hkraw nlu la hkraw re da. Dai she dai shi hpyi ja ai lam gaw shanhte kahtawng ni sha nre oh kaga kahtawng kaw na ni chye mat ai da. Chye mat re na she kaga kahtawng kaw na num langai mi hpe sa hpyi ai shaloi wa she num dai grai tsawm ai num re da. Dai wa she sa hpyi dat ai she kalang dat hkraw ai hku nga, hkraw re she dai shi gaw mau mat ai da. Mau mat re na she mau mat re na aten kadun hte sha num ndai bai hpang e nhkraw mat na tsang na she shi gaw num dai hpe bai hkungran la na matu hken lajang ai da. Hkyen lajang re da, dai she hpa majaw num dai hkraw ai i nga yang she la dai hpyi nau ja ai re majaw shi nhkraw yang gaw shi hpe hpyi kawa sat kau na hkrit na shi gaw hkraw ai da. Dai majaw shan 2 gaw hkungran mat sai da, hkungran mat re shaloi she hkungran ai hpang e she ndai shan 2 gaw mayu nta de bai wa na matu hkyen ai da. Hkyen ai shaloi dai shan wa na lam de gaw hka hku rap ra na hku re nga, kawa hpawng hte rap ra ai hka nga ai da. Dai shaloi she shan 2 wa re ndai num jan gaw dai kawa hpawng kaw du ai shaloi she madu wa hpe she e nang shawng lung u, ngai ya hkan lung na re ngu na she wawn naw hka kaang de kachyi mi naw htu bang na ngu na dai hku tsun na she shi gaw hpang hkrat taw ai da. Rai na she ndai la madu wa shawng hpawng ntsa de lung sai da. Wawn kawa hpawng ntsa de lung, madu wa atsawm sha dung re na she shi gaw kawa hpawng hpe e gyit dun da ai sumri ni raw re na she kawa hpawng htu ai wa she shi gaw n lung, lawan lung rit, lawan lung rit ngu madu wa tsun tim shi gaw n lung ai sha dai hku na htu bang kau dat ai da. Hka kaang de htu bang kau dat re na she shi gaw nhkan lung, madu wa gaw yawng hkrai yawng rai mat wa ai da. Grai yawng hkrai yawng mat wa ai da loh, dai she dai shani da, shana da, nhtoi kade ya re kun n chye ai da, dai hku na n sin nhtoi pyi n chye mat sai da, shi gaw dai kawa hpawng ntsa kaw e shat nau kaw si na si ai zawn, hkrung ai zawn dum ai zawn zawn gaw nga, kaw gaw kawsi re na si si zawn gaw nga, re na kawa hpawng kaw sha mara nang re na wa hpawng gaw yawng tik tik yawng tik tik re kaw sha hkan nang mat ai da. Shing re na hkan nang mat ai shaloi gaw shaning hku na mat ai mi re, shata hku na mat ai mi re pyi shi n chye mat ai da. Pang lai de du mat wa ai da, shi na hpawng gaw dai shaloi she dai de du mat wa re shaloi she masha shaga n sen na ai da. Shi gaw nlu shaga mat ai, n lu sharawt mada mat ai da, masha shaga nsen na re na she shi hpe um ndai masha oh ra jasi she rai nga ai, shi hpe e hka de kanawng jahkawn kau ga, ngu ai dai sha na kau dat ai da. Dai sha na kau dat re na anhte bai shaw da yang mung shi na du u galaw ai, shi hpe lup ai kaw gumhpraw bai ma na re dai majaw hka de jahkrat kau ga ngu dai sha na dat ai da. Dai sha na mat re she shi hpe gara hku kaning di ai mung nchye mat sai da, nchye mat re she hpang e re jang gaw, shi wa she le hka kata de wa she dai hka kata kaw na dai kaw na baren hkawhkam hte aw hka nat hkawhkam da law, hka nat hte wa rau nga taw sa na hku rai nga. Rau nga taw re she dai kaw wa she nga mat sai da e, dai kaw pyaw dum mat sai da, pyaw dum mat re na she pyi naw nga mawn mat sai da. Shi gaw mi shi byin ai lam ni hpe bai myit dat kalang mi gaw dai bai myit dum dat re shaloi she, masha nsen bai na dat sai da e. Masha nsen bai na dat re jang shi wa mi shi e hka de jahkrt kau ga nga dai myit shachyaw la na she shi gaw dai bai dum dat na she nanhte ma ni mung ngai hpe e hka de jahkrat bang kau ai ni re nga, hpa majaw ya ndai de bai sa myit ta ngu dai ni hpe pawt dat ai shaloi gaw oh ra ni gaw shi na nsen na dat ai shaloi hkrit nna she wa mat ai da. Re na she shi gaw shi hpe hka de jahkrat bang kau ai re mung hpa pyi naw nchye dai hku na tsun dat ai shaloi gaw oh ra ni wa mat, hkrit hkrit na hprawng mat wa, re hku re nga, timmung shi bai nga ai shara gaw shi na hkum shi bai atsawm sha myit dat yu yang gaw hka kata kaw e ndai hka nat hte rai sha nga taw nga ai da. Dai she shaning pyi naw gaw 2, 3 ning na mat wa sai hku re nga, shi dai kaw nga shaloi gaw, dan re she shi gaw shi kaw na she dinghta ga de ngu na i shi na madu jan hte gara hku byin ai, shi kaning re na dai hka de du wa ai ngu hpe wa shi wa myit wa sai da e. Myit wa re na she e ngai ndai kaw nga nga yang gaw nmai na kun, ya ngai nye madu jan ngai hpe e dai hku di kau dat ai, ngai grai pawt mayu ai, nye madu jan e wa sat kau na ngu dai sha shi myit hta rawng taw nga ai da. Nat wa gaw nang hpa baw myit taw nga ta, nang na dinghta ga de nang wa mayu ai nre i, nang wa mayu yang mai wa ai, nang ra ai hte ja ni nang ra ai made la wa u ngu na tsun ai da. Ngai dai ni n la wa mayu ai ngu da, ngai gaw dinghta ga de wa na nye madu jan ngai hpe ning re na shayawng kau dat ai re majaw nye madu jan e sha wa sat kau mayu ai ngu na tsun ai da. Retim mung hka nat wa gaw tsun ai da, e nang dai hku n mai myit ai, na madu jan dai hku na nang hpe dai hku galaw kau dat nna gaw kade mi myit malai taw nga ai kun pyi nchye ai nang dai hku wa sat kau na hku gaw nmai wa ai, na madu jan hte atsawm sha wa nga na hku re yang gaw mai ai ngu na dai hku tsun ai da. Kaja wa dai hku nga yang gaw ngai gaw wa na ngu na tsun jang she, kaja wa shi e ja ni ma jaw dat ai da, ja ni ma jaw dat re na shi gaw wa sai, aw dai ja ni jaw dat na she mi shi e madu jan htu kau dat ai i, htu shayawng kau dat ai shara du hkra dai hka nat wa gaw shi hpe wa sa dat ai da. Shi hpe wa sa dat ai hte she dai shi gaw dai kaw na hka kaw na pru ai hte she hka kau de lung wa sai da. Hka kau de lung wa na ya ngai gaw nta de wa na kun, nye nta de madaw wa na kun, n re yang e nye madu jan e madaw tam la na sat kau na kun ngu na dai hku na myit taw nga ai da. Dai she i nta de rai nwa yang she ndai shi e hka nat wa tsun dat ai i, na madu jan e sat kau gaw n mai ai, na madu jan pyi kade she myit malai na matsan mayen re na nang e la taw nga ai kun ngu ai ga dai hpe bai dum dat re na she, aw. . ngai nta de nwa na re ngu na she kaja wa nan dai hpe myit let she dai hka kau hku shi hkawm garet wa shaloi kaja wa num langai mi wa hka kau kaw e tsap taw nga ai da, kara gaw galu law na kara ni shaya da re na tsap taw nga ai hpe mu na she shi gaw aw ngai sha myit kaji garen, aw num dai gaw hkrap taw nga ai da law. Hkrap na tsap taw nga da, myi man mung atsawm sha nmu re hkrap dagup let tsap taw nga ai majaw myi man atsawm nmu, aw ngai sha grai garen gari re nga kun ngu yang nang mung kadai hpa baw kaning re na nang hkrap nga nta ngu na wa shaga dat ai da. Wa shaga dat ai shaloi gaw num dai wa gaw gayin yu dat ai hte madu wa re chye na she madu wa e hkrit nna shi gaw kalang dat hka de gumhtawn bang mat wa ai da, gumhtawn bang mat wa na she ndai la wa gaw shi hpe bai lawan dik ai hku na bai hkan shaw la na she, hkan shaw la na atsawm sha yu dat yang shi na madu jan re taw ai hpe chye ai da. Re na she dai kaw na she madu jan e madu jan she shi hpe bai tawng ban ai da, ngai dai hku, dai hku nang hpe dai hku nra ai re, nang hpyi lu na nang e hpyi hkrit nna sha dai hku wa ai re majaw nang hpe yawng si mat u ga ngu na ngai dai hku galaw ai re, retim mung ngai gaw na nta de bai wa na matu mung ngai gaya ai majaw ngai nwa ai. Nye nta de nye kanu kawa ni retim mung ngai hpe nta de n jashawn la ai, ngai hpe n gu dang mi sha jaw dat nna ngai hpe shapraw kau ai re. Dai majaw ngai gara de nchye sa nna ngai hpun pawt kaw sha yup nna dai hkan e sha nga mat ai re ngu na tsun ai da. Dai shaloi shi gaw le hka nat hte nga ai, retim shi gaw dingla mung n dingla jat ai da, shi na madu jan gaw grai dinggai mat ai da, dai kaw na madu jan hpe e matsan dum re na she atsawm sha re na shi na nta de e woi wa na shan gaw grai pyaw nna bai nga nga mat ai da. |
