| Description |
Transcription (La Ring)
Ya ndai gaw Jahkrai ma hte gwi nyau hkan Woi Dwi a maumwi rai nga ai ya ngai hkai na maumwi gaw. Moi... shawng de da, mung langai mi kaw, kahtawng langai mi kaw dai kahtawng kaw gaw grai... matsan jamjau ai hkan Woi Dwi nga ai da. Hkan Woi Dwi hkrai.. matsan mayan rai na galaw lu galaw sha, ayak ahkak rai na galaw lu galaw sha nga ai da, sha nga ma ai da. Dai aten hta e um.. ndai hkan Woi Dwi yak hkak rai na matsan mayam rai na galaw ahpre sha na nga nga ai ginra, hkan Woi Dwi a yi e.. gaiwang kaw e hkan Woi Dwi e.. galaw sha nga ai yi kaw e ndai nlung aseng htoi ai ndai sa nga nga, sa chyai chyai re da. E..sa htoi taw nga ya ya re da. Shaloi jang gaw ndai grupyin laiwa laisa masha ni gaw mu ai da. Mu nna she "E.. dai anhte kahtawng kaw na Jahkrai hkan Woi Dwi a yi kaw gaw dan rai na htoi kabrim ai nlung langai mi nga ai. Shing rai na sa htoi ya ai kaw hkan Woi Dwi galaw sha nga ma ai" ngu na ngai hte ngai tsun wa sai da. Shaloi gaw dai mung na mung Du mung Hkaw Hkam ni na wa sai da. Na wa jang gaw "Woo.. ya dai gaw kaning re ai kun, sa yu masu" ngu na me shi a Amat Wun Gyi ni hpe dai Jahkrai ma hkan Woi Dwi galaw sha ai yi kaw htoi taw nga ai aseng hpe sa yu ma ai da. "Woo... teng ai law Madu Hkaw Hkam e, Du wa e teng nga ai" ngu bai wa tsun sai da. Shaloi gaw "Aw dai rai jang gaw shing re ai Jahkrai ma hkan Woi Dwi ni kaw dan re htoi kabrim ai seng htoi ai gaw nging ndan ai she re.. nang Madu, Du Madu Hkaw Hkam htingnu kaw htoi ai baw she re, sa la masu" ngu na she bai Amat Wungyi ni hpe dai mung du wa gaw bai shangun dat sai da. Shaloi gaw sa hpai jum yu jang gaw ga tawng byin mat, nga hkyi byin mat e rai nna me gaw lahkawng masum lang sa la yu tim dan rai byin mat mat rai sai da. Shaloi jang ndai e.. "Seng ndai gaw kaning di nla ai" ngu na Amat Wun Gyi ni gaw gara hku nla sai, nmai byin ai kade lang mung la yu tim nmai byin ai ga tawng nga hkyi byin mat mat re ai ngu na rai ai shaloi gaw E.. dai rai yang gaw Madu Hkaw Hkam mung kaning nchye di sai da. Shaloi gaw kaning di na i.. ngu na e mau sumru nga ai ten e she, ndai mung na Du kasha mung Du kasha mung Hkaw Hkam shayi kasha she "E.. Nu yan Wa e nan yan dai ram myit law shara mi n nga ai, ngai ningsha lu la ai" ngu na me tsun sai da Kanu yan Kawa hpe. "Ngai lu la ai, ngai sa lu la ai" ngu sai da. Shaloi jang she "Aw.. nang wa lu la na rai yang gaw sa la yu su law e" bai ngu sai da kasha jan hpe. "Sa la yu le nang she chye la jang shaloi nang hpe mung chyen mi ma jaw na" ma ngu sai da kasha jan hpe. "Dai seng sa lu la jang nang hpe mung chyen mi ma up sha shangun na" ngu sai da shaloi gaw "Mai ai Nu yan Wa e, nan yen ndai mung chyen mi jaw tim njaw tim ngai gaw sa lu la na sha re" ngu sai da. "E.. nang dai ram wa ga sadi jaw jang gaw kam sai sa la su" ngu na ahkang jaw sai da. Shaloi gaw dai shayi sha Du Hkaw Hkawm shayi sha dai gaw Jahkrai ma hkan Woi Dwi kaw me she shani sa, shana sa na she, sa na she "E.. Jahkrai ma e nang hte an yan gaw prat tup jaw lup na hkungran num hkungran la e.. dinghku de ga" ngu na sa tsun sai da. Shaloi jang she "E.. nang wa Hkaw Hkam shayi sha Du shayi sha re gaw, an Woi Dwi matsan mayen re e gaw tsaw na ra na ma nre ai, dai re majaw gaw ga laban re law, an Woi Doi nhkap la ai law" ngu na gaw grai ning dang yu ma ai da. Raitim mung nlu ning dang ai da shi mahtang sa nga nna she galaw ra ai galaw, hka ja, hpun hta shat shadu dinghku kanu hku she shi bai sa up hkang galaw sha rawng nga sai da. Shaloi gaw aw.. dai kaw na gaw kaning nchye di e.. dai hku ra ai nra ai nga tim shi mung sa nga nga sai rai jang gaw wo ra hkan Woi Dwi nhkap la timung shi mung sa nga nga sai rai jang gaw e.. rai sai da dai Jahkrai ma jan ngu na nga ngai sai. Rai jang gaw shi mung dai hku dinghku kanu hku sa nga taw jang gaw e.. Jahkrai ma hkan Woi Dwi mung e hkap la ai daram rai mat rai jang she dai aten gaw kade na ai gaw nchye, kade ning re gaw dai gaw ntsun ma ai maumwi hta nna ai. Rai yang gaw nga jang gaw shi gaw dai Jahkrai ma jan sa tai mat ai rai jang gaw dai seng dai gaw shi a sut rai mat sai mu. Shaloi jang she dai Jahkrai ma e she "Wa ga.. Nnyi, Ntsa ni hpang de Hkaw Hkam hkaw de wa ga, Du nta de wa ga, Nnyi Ntsa ni htet ai, shaga ai re majaw ndai seng ma mu mayu ai da ndai ma wa madun ga, hpai u ndai hpai ga, seng ndai shani shana htoi ai Nnyi Ntsa ni hpe wa madun ga" ngu tsun sai da. Shaloi jang she kaja wa dai hpai.. nna gaw kam nna gaw hpai wa masai da. Shan yan gaw dai hpai nna wa yang she dai mayu nta ndai Hkaw Hkam htingnu kaw dai du ai hte gaw Kanyi yan Katsa hpe gaw dai kasha jan e "Yu Nu yan Wa ngai lu la ai ngu sai le, ya rai sai le dai gaw ndai rai nga ai Nu yan Wa" ngu na she wa madun sai da. "Aw.. nang tsun ai ga teng ai i, nang lu shatup ai e.. rai sai ngai sha gaw ram ai rai sai" ngu nna hkap kabu hkalum la nna e.. hkap la nhtawm me e htaw.. tsaw la ai ntsa de, nta ntsa de noi kabrim htoi kabrim tawn da kau sai da. Masha sha gaw nmai lu la sai da. E dan re kaw tawn kau rai jang gaw, dai lu la ai hte gaw dai Hkaw Hkam shayi sha dai mung bai Jahkrai ma jan ntai sai da. Nwa mat sai da Jahkrai ma hkan Woi Dwi kaw nwa mat sai da. Dai seng lu la ai hte gaw hkan nu wa ni a nta kaw nga mat Jahkrai ma jan nteng mat sai da. Dan rai jang gaw Jahkrai ma gaw wa, Kawoi Dwi kaw wa rai na she "E.. Dwi e mi kaw na ndan rai na shadu yang ya rai sai, ya nwa sai hkannu wa ni nta kaw nshamu sai seng ndai lu la ai hte nwa hkraw mat sai, e.. mi kawn ndan rai na nawn yang" ngu yang she Kawoi Dwi mung "E.. teng nga ai mi kaw na an Dwi gaw nhkap la ai tim shi mahtang dai hku ndai seng hpe ra nna rai nga ai. Ya kaning di sana an Dwi hpe gaw nra ai seng e gaw ra rai na me ya daini gaw an Woi Dwi gaw kaning di sana law, kaning di na dai seng hpe sa la sana, an Woi Dwi e nga na she sa nga ai sa chyai ai sa chyai ai sa htoi kabrim ai seng wa ya an Woi Dwi nlu mat, e.. Hkaw Hkam hkaw kaw Hkaw Hkam hkan nu wa ni la kau ya ai gaw kaning di na bai sa la sana kun" ngu na aten shagu bawngban ai da. Shaloi gaw gwi hte nyau ma wa dung madat lawm ai da. Hkan Woi Dwi dai chyu chyu tsun ai gaw gwi yan nyau gaw na ai da. Na jang gaw dai ten hta ga hkrum na masa nga ai hku tsun nga ma ai. Rai yang she gwi yan nyau gaw hkan Woi Dwi a seng dai grai myit machyi ai tsun ai hpe na ai hte gaw gwi yan nyau mung bawng sai da. "E.. Jahkrai ma hkan Woi Dwi dai ram wa tsawra ai seng daini Hkaw Hkam wa Madu Du ni la kau ya ai gaw ya.. ndai gaw e kaning di la na grai yawn hkrap shali ai lam gaw ndai gaw an yan gaw lu la ai", "Ngai gaw lu la ai" ngu na gwi tsun ai da. "Ngai lu la ai" ngu jang she, langau hpe she bai bawng ai da. "Nang nkam i, seng dai sa la ga" ngu lanyau hpe bawng jang "Kam ai" ngu da. "E.. lu la ai, ngai mung lu la ai seng dai gaw ngai mung lu la ai" ngu na lanyau mung bai madi shadaw nna she shi mung grai myit tsang ai hku nyau mung "Ngai mung kam ai, sa la ga" bai ngu ai da. Shaloi she "Mai ai" ngu. Rai jang gaw e.. gwi gaw tsun ai da "Nang hpe gaw ngai ba na wo hka rap ra ai kaw mung ngai ba shalai na, htaw shalai na. Nang nye ntsa kaw jawn ngai ba sharap na hka rap ra tim" ngu da. Shaloi jang she "Mai ai" ngu da "Nang ba sharap na rai jang mung grau kaja ai, dai hku rai jang grau awng dang na re, mai ai rawt ga, sa ga" ngu na shan yan gaw bawng la nna tsun nga ai da. Tsun jang she hkan Woi Dwi mung bai na ai da. "E..e...e ya nan yan sa lu la ai nga jang gaw sa la wa marit... ya anhte a seng ndai wa dan di na sa la kau ya. Ya anhte gaw kaman nsin chyip chyip kaw nga ra. Dai nga ai seng htoi nga ai aten hta anhte nsin nhtoi, nsin pyi n nga ai zawn nga kade she pyaw ai wa, ya anhte seng dai n nga mat na asin chyip kaw nga ra ai. Anhte yawng a rai nga ai, gai gai lu la jang sa la wa marit". "Rai yang nang langau nang gaw kaning di na rai, kaning di hkawm na rai, lam galu ai wa kaning di hkawm na rai" ngu yang "Gwi kaw jawn na", "Gwi nang gaw kaning di na lanyau e kaning di na" ngu yang "E.. ngai ba na" ngu na hkam la hkat ai da. Shaloi jang gaw gwi a ntsa dung na gwi gaw nyau e ba rap, ba hkawm mat wa sai da. Hkawm mat wa dai Hkaw Hkam hkaw de sa mat wa ai shaloi gaw hka kaba langai mi mung din ai da. E dai hka kaba langai din ai dai kaw gaw gwi lanyau hpe ba sharap, wo hkran bai rap yang she Hkaw Hkam kaw du hkra ba sharap rai yang she.. le.. Hkaw Hkam wang kaw du ai hte e gaw gwi gaw Hkaw Hkam wang du ai hte sa, anyau hpe shayu nna, lanyau gaw yu nna she dai Hkaw Hkam wang de mayun shang wa nna she nhku de shang wa nhtawm htaw.. htoi kabrim la ai shanhte a seng.. dai e she nhku de shang wa na dai lung.. nna lanyau gaw dai htaw tsaw la ai ntsa na noi tawn da ai seng dai she wa lung kawa di hpai hprawng pru wa sai da. Hpai hprawng pru wa na nta wang shinggan Hkaw Hkam wang shinggan kaw gwi gaw la nga ai da. Dai kaw hkrau di na she nyau gaw seng dai hpai, ntsa kaw gwi a ntsa kaw jawn rai da, gwi mung e dai seng hte ngau hpe htaw nhtawm me she hpang lam de, jahkrai ma a nta hpang lam de e wa masai da. Wa yang gaw mi rap da ai dai hka a wo hkran hka danam rap ai hka hkindawt ntsa kaw na hpun kaw "Lang Da" kaba bai hkap nga sai da. Dai hku rai lai mi lai hpe rim sha na kadai mi pru wa tim rim sha na hku Lang Da kaba masha mung rim sha ai hpa mu hpa rim sha ai Lang Da kaba bai dung nga sai da. Ndai hkran kaw na yu yang dai bai, "Kaning di sana i.. ya an yan gaw kaning di na lai sana, kaning di na rap sana, nsin sin wa shat gaw kaw si jan du wa kaning di sana loi" ngu na bai jawm myit nyan nga masai da. Shaloi jang she jawm myit nyan nga jang she myit sumru shapraw sai da. Shaloi gaw gwi gaw myit yu sai da, gwi myit yu nna she "E.. nang e.. nrap yang gaw nmai ai e.. re majaw nang gaw wo hkran du jang hka kau kaw wa yu nna me gaw gawp gyem nga u, ngai dai kawng ntsa lung nna n-ga hku wa yup si galau masu nga na", "N-ga hku wa kra galau nga na, shaloi jang Lang Da wo ra ngai e sa hpai sha nga na, sa magra sha nga na shi htim hkrat wa nye ntsa kaw kap re hte nang dai makoi nga kaw na kagat wa nna shi singkaw npu hku lup di nna, shi a jahkraw ngai e kawa maw ai kawa wa ai kaw nang ngai hpe rai nlu kawa yang shi jahkraw kawa di u, shing di na dai e jahkraw kawa baw kau ya nna sat kau ga, ngut na lai di mat wa ga" ngu na gwi gaw dai hku woi nyan ai da. Gwi woi nyan ai hte maren nyau mung madat nna dai hku na gwi gaw shi hpe shayu makoi tawn da nhtawm me she e.. htaw.. kawng de lung wa na wa n-ga hkala hka wa kra nga jang she Lang Da gaw dai mu jang she gwi e sa rim hpya sha na matu she pyen hkrat wa ai hte shi sa wa ai hte wo.. gwi kaw du ai hte shi gaw singkaw npu kaw e shang nna kagat bang nna e dai Lang Da a adu kawa di, jahkraw kawa baw sat kau ai da. Shing di na dai e lu sat kau nna shan yan gaw apyaw sha, gwi kaw bai jawn rai seng dai hpai rai nna e.. Jahkrai ma nta kaw bai lu du wa sai....da. E dai majaw dai Jahkrai ma dai hkan Woi Dwi gaw dai shani kaw nna gaw lanyau hte agwi hpe, rai shan gaw wo ra kaw wa du ai shaloi gaw Jahkrai ma hkan Woi Dwi hpe wa tsun ai gaw "Kadai mung amat la mayu, kadai mung power la mayu, kadai mung grau kaja ai mying gaw grau ra, numbat langai mying ra nna she "Ngai rai nga le ngai ngu" langau mung "Ngai rai nga le, ngai sa lu la ai rai nga" ngu agwi mung "Ngai sa lu la ai" ngu rai jang gaw kadai tsun ai mung gaw teng ai hkrai raitim mung e.. shara garan ya ai da dai hkan Woi Dwi gaw. "Gai.. gai gai gai hkum dara hkat nga masa, rai sai rai sai nan yen lahkawng shakut na lu ai rai sai. Nan yen hkawng grai ram ai, e nan yen lahkawng shakut nna gwi mung shakut ai nyau mung shakut na maren sha shakut na lu ai she re gaw, gai gai ya langau nang gaw nhku de sin nhku zawng, nang nang nhtung dung nna nhku sin u, e.. rai na gai gai nang gwi gaw le ndaw ting yu up u, ndaw de yu up u e.. ntawt kaw dung nna ntawt kaw yup nna sin u, nta sin u wang sin u e.. seng ndai nmat na hku sin u" ngu na shan yan hpe ahkaw ahkang garan nna me ahkaw ahkang jaw kau sai da. E dai shani kaw nna ndai nyau hte gwi nhkaw ai.. nga na e..ndai Jinghpaw masha ni hkai ai maumwi ndai nyau hte gwi a maumwi, dai shani kaw nna gwi hte nyau mu jang galaw ai gaw dai shan yan a amat kashun ai majaw nhkaw ai nga nna hkai ma ai law. E maumwi gwi hte nyau Jahkrai ma maumwi ndai hte rai sai. |
