| Description |
Transcription (Htu Bu)
Ya ngai hkai na maumwi gaw, Galang kaba ndai nawng kaba kaw e, Taubyen ni hpe rim sha sha re ai Galang kaba langai mi a lam rai nga. Moi, ndai hka nawng kaba langai mi nga ai da. Hka nawng kaba langai mi nga rai yang she, Dai kaw gaw, Taubyen ni, Nga ni grai rawng ai da. Galang kaba gaw hpa n ba ra ai sha she, Dai hka nawng makau kaw na lung du dai kaw sa dung nna she, Taubyen ni, Nga ni chyai hkawm jang, shi gaw dai hku hkap rim sha kau, hkap rim sha kau re ai da. Lani hte lani gaw dai makau hkan na Taubyen kasha ni gaw, ma mat wa sai da law... Ma mat wa rai jang she, Taubyen kanu gaw, lani mi na gaw shi gaw, "Hpa rai na anhte a kasha ni gaw lani hte lani n law mat wa ai i? ngu nna she, lagu yu nga yang she, Galang wa she, dai lung du kaw sa mayun dung nga na nlung zawn zawn re sa hpum nga na she, dai Taubyen ni, Nga ni pru hkawm jang, shi gaw hkap sha kau kau re ai da. Hkap sha kau kau rai jang she. Lani mi na gaw dai Taubyen kanu gaw, nyan sai da. "Galang ndai hpe kaning di nna wa, lu sat na i?......." dai hku nyan sai da. Nyan nna she, dai lungpu kata kaw she, shi gaw makoi rawng nga ai da. Makoi rawng nga na she, Taubyen kasha ni dai makau hkan pru hkawm jang, Taubyen kasha ni hpe rim sha kau kau re ai mu sai da. Mu nna she, lani mi na gaw dai Taubyen kanu gaw lungpu kaw makoi rawng nga nna she, Galang, sa makoi dung nga nna Taubyen kasha rim sha na nga, hka de ning....nga baw gum bang dat ai hte she, ndai Taubyen kanu gaw kalang ta she, lungpu kaw na gra di nna Galang a baw kaw kalang ta nyawp di nna kawa nna hka de dun bang kau ai da. Dai kaw na dai, dai nawng kaba dai kaw na, Galang kaba, dai nawng hpe e, Nga kasha ni, Taubyen kasha ni e sa sha kau kau re ai Galang hpe e, dai shani kaw na Taubyen kanu dai dang sha kau ai da. Dang kau ai da. |
