| Description |
Transcription (Htu Bu)
Moi gaw Shinggyim masha ni gaw Karai Kasang a lam hpe garai n chye ai shaloi, Mahtum Mahta ngu ai sumsing de, lamu de nga ai. Dai ni hte chyu sha shanhte matut manai nna nga ma ai da. Shinggyim masha ni a nsoi nsa gaw Mahtum Mahta ni jum tawn da ai re ai da. Shanhte gaw si tim Shinggyim masha ni hpe gaw n si shangun mayu ma ai da. Law htam mayat maya nna nga shangun mayu ma ai da. Shanhte Mahtum Mahta ga de na ni rai jang gaw grai si ai da. Shaning shagu masha si, shata shagu masha si rai jang gaw, moi nat jaw hku nga jang gaw, ndai Kabung dum ai hpe shanhte gaw grai arawng la ai. Masha grau law magang arawng grau lu magang dai hku sawn ma ai da. Mahtum Mahta ni masha si sa i nga jang Shinggyim masha ni hpe, Kabung dum na matu galoi mung Kabung wa ya mi nga na sa shaga ga re ai da. Shaning hti na nga lai wa ai shaloi gaw Shinggyim masha ni gaw, Mahtum Mahta ga de e, Kabung wa ai gaw grai lang shaning hti nna nga wa sai da. Dai majaw shanhte Shinggyim masha ni mung, "Anhte, anhte mung si yang mai ai law. Anhte si jang gaw Mahtum Mahta ni hpe ma anhte Kabung wa shaga na. Anhte, shanhte kaw ga grai la da sai re. Anhte Shinggyim masha langai mi si yang mai ai law. Si yang mai ai law." nga tim, Mahtum Mahta ni gaw, "N mai si ai. Nanhte mungkan jahpring nna nga mu. Masha n law ai. Grai law nna nga wa mu." ngu ai da. Kalang mi hta na gaw, la langai, jaugawng langai wa mi gaw, shi jaugawng gawng hkawm ai shaloi, Jahkai mang langai mi, ga kaw taw ai shi sa mu ai da. Dai gaw Galang Langda kaba langai mi, hpun ntsa kaw tsip tsip tawn da ai wa, U Di di tawn da sai wa, dai wa Woi wu nawng mi lai wa nna she, U Di dai ni yawng baw lu kau ya, tsip ni mung yawng jahten kau rai na, Woi ni gaw U Di sha baw lu na le, shara shagu du mat wa. Galang bai du wa ai shaloi gaw shi a tsip mung jahten kau ya, U Di mung n nga mat rai jang gaw, shi gaw grai... pawt ai da, grai pawt. Galang gaw grai pawt mayu na, "Kade e ndai zawn di kau ya ai rai kun?.." ngu na hkan tam hkawm wa yu yang, Jahkai langai mi hpun kaw e noi nga ai hpe mu ai da. Dai majaw Galang gaw, "Ndai wa rai ang sam sai, nye tsip sa jahten ai. U Di yawng sha kau ya ai, ndai wa rai sai." ngu na dai Jahkai dai kaw sa htim amya nna, achye sat nna, ga de jahkrat tawn da ai da. Ning rai jahkrat tawn da ai shaloi gaw, dai mare kaw na num, ma ni gaw hpun, lahpaw la nga nna e nam de sa ai shaloi, Jahkai langai mi dai hpe e gun wa ma ai da. Gun wa na nta kaw na ni hpe wa madun ai. Mare hkan na ni hpe ma madun ai. "Daini num sha ni hpun hta sa, lahpaw la sa re na hkawm wa hkawm sa re shaloi ndai Jahkai langai mi hpe e gun wa ai. Ya, anhte Shinggyim masha ni mung grai si mayu ai wa, anhte rai yang gaw n mai si ai nga. Mahtum Mahta ni rai yang gaw chyahkring n're si si re. Ya ndai Mahtum Mahta de na ni hpe mung, 'Anhte Shinggyim masha ni mung si saga ai law..' ngu na shana ga. Shing rai na e, 'Anhte kaw e Kabung wa ya mi.' Kabung sa dum wa mi.' ngu nna e shana na re." ngu nna dai hku shana sai da. Jahkai dai hpe rai jang gaw, htaw, ndaw kaw na ahtum kaw she, htum hku kaw she Jahkai mang dai kaw tawn da nna she e, dai kaw bang tawn da, hku wan hte bai dagup tawn da rai. Mahtum Mahta ni gaw grai mau ai da. "Kadai na sumri sumdan nu ai lam mung n nga, di ai lam mung n nga. Kadai si ai i?.. Shanhte a asak sumri gaw anhte she jum ai wa mi, Shinggyim masha ni si sai nga Kabung shaga ai gaw. Raitim Kabung naw sa dum masu. Shanhte, anhte kaw grai sa sai re majaw sa dum masu." ngu, Shana ting Mahtum Mahta ni gaw Kabung dum ai. Kabung grai nan nan gaw dum sai. Dai hku dum, jahpawt de nhtoi htoi du hkra dum. Rai jang gaw, "Wa saga, saga." nhtoi hprim hpram re shaloi gaw "Wa saga, wa saga." nga na shanhte gaw Mahtum Mahta mahkawn shabrang ni gaw wa sai da. Htaw, numshang kaw du ai shaloi she, loi loi myit-su ai ni mung lawm re, re majaw she, Dai loi mi myit-su ai wa tsun ai da, "E, anhte le ya, mana ting gaw Kabung gaw sa dum sai wa, ya kaba ai ni lama hkap san yang gaw 'kadai rai nni?' ngu anhte hpe hkap san yang, anhte gaw kaning ngu na tsun dan na rai? 'Kadai si ai rai?' nga yang anhte n chye tsun dan na ra ai. Kaning ngu na wa, wa tsun dan na rai? E, ndai gaw n jaw sai law, Kabung gaw dum amang mung n taw re kaw wa. Masha si ai mung n mu ai kaw wa mi, Kamung sa dum ai gaw. Ndai gaw n jaw ai law. Naw nhtang sa ga. Pasi shamat kau ai ngu nna naw nhtang sa tam ga." ngu na tsun ai da. Manang ni mung, "Re law, masha si ai gaw nga mang mung n taw ai kaw mi Kabung woi dum ai gaw. Kaba ai ni hkap san jang kaning ngu na law na lo e." nga myit hkrum na shanhte gaw, Pasi shamat kau ai ngu na tsun ai da. Nkau mi gaw Hkyindang hkrat mat ai ngu na tsun ai da. Mahtum Mahta mahkawn shabrang ni bai nhtang sa. Bai nhtang sa nna she, "E, mana anhte Kabung dum ai kaw e, Num ni Pasi shamat kau, Samit shamat kau re nga na, Hkyindang shamat kau re nga na, dai naw tam mayu ga ai law." nga jang nta madu ni mung "Tam mu. Nanhte ra ai hku tam mu. Tam la mu." ngu ahkaw ahkang jaw. Oh..sumbu sumdang, shingjut shingnaw tam she tam hkawm, tam she tam hkawm, Hpa n mu, nhku ting shabrang ni, mahkawn shabrang ni mawng she rai tam tim, hpa mang mung n mu, hpa mang n taw ai kaw she Kabung dum kau sai ngu. "E, n mu sai ka re. Naw wa sana." nga na shanhte pru mat wa yang, le ndaw kaw e, htum kaw e, hku wan langai mi dagup tawn da ai mu ai majaw, Shanhte gaw dai kalap yu yang Jahkai mang taw ai sha mu ai da. Dai majaw dai Kabung dum ai ni gaw, Mahtum Mahta gaw de bai du wa ai shaloi gaw, Kaba ai ni hkap san ai, "Kade nta kaw, kaning ngu ai la, asak kade ram kaba sai wa si ai? Kaning rai na si ai da?" ngu na san ai shaloi gaw dai, Mahtum Mahta mahkawn shabrang ni gaw, "Hpa masha mang mung n mu ai. Hpa masha mang mung n mu ai. Hkrap ai ma kadai n nga ai. Anhte dai hpawt sha numshang kaw na bai nhtang sa nna e, amang sa tam ai hpa mung n mu ai. Le htum kaw e hku wan hte dagup tawn da ai Jahkai mang chyu sha mu ga ai." ngu na wa tsun ai da. Rai jang Mahtum Mahta ni gaw loi pawt mayu wa ai. "Ga...Shinggyim masha ndai ni gaw, garai hkum si mu. Mungkan jahpring nna naw nga mu she ngu yang me e, ya kaw nna dai ram si mayu wa ai gaw." Dai ram si mayu jang gaw Mahkawn Shabrang ni, a Ma ni gaw n si u ga. pung hpraw pung law re ai ni, gumgai dingla sai, n shamu lu sai, n hkawm lu, bungli n galaw lu sai ni mahtang si mu ga." ngu na shaman ya ai da. Dai kaw na gaw Shinggyim masha ni gaw, pung hpraw pung law re sha n ga, Mahkawn Shabrang mung si wa, Ma kaji ni mung si wa re, si hkrung si htan a npawt gaw ndai kaw na Shinggyim masha ni nau si mayu ai majaw, Mahtum Mahta ni Shinggyim masha ni a asak sumri dan ya majaw daini si hkrung si htan law wa ai re da. |
