Item details
Item ID
KK1-0443
Title Wunpawng sha ni hkungran ai lam (The marriage of the Kachin people)
Description Transcription (La Ring)
Tsun sagaw i. Ya Jinghpaw Wunpawng amyu sha ni num wawn num la num jaw num ya na rai yang lang nga ai htung hkying ningli hpe ka lajang da ai lam hpe hti dan na. Ya ndai numwawn numla num jaw num ya ai lam hpe hti dan ai salang wa gaw Salang Langai Tu Awng ngu ai re Myitkyina Shatapru Chyurum lawk kaw shanu nga ai wa rai nngai. Anhte Jinghpaw Wunpawng amyu sha ni gaw moi chyaloi nhkoi ginru ginsa nnan yu hkrat wa ai prat kaw nna mayu dama kahpu kanau nga nna nga pra sa wa ai Jinghpaw Wunpawng amyu sha ni rai nga ga ai law. Dai hte maren daini na prat ladaw aten du hkra mayu dama kahpu kanau amyu ni nga nna langai hte langai ru sai makyit hkin dun let shachyen shaga hku hkau kanawn mazum nga nna kadai wa kadai jan mung grai wa jasam masha ni nlawm nga ga ai sha yawng gaw jinghku jingyu daw hkat ai ni hkrai rai nga ga ai. Hpa majaw nga yang langai hte langai shachyen shaga sa wa yang mayu kajum kaji dama kashu kahkri shing nrai kahpu kanau daw ang nga ga ai nga nna chyu sha shachyen shaga kanawn mazum nga chye ai Jinghpaw Wunpawng myu sha ni hkrai sha rai nga ga ai law. Ndai zawn amyu baw hpan masum hte sha nga pra sa wa nga ga ai amyu ni sha rai nga ga ai majaw kadai wa kadai jan mung grai wa jasam masha gaw nlawm nga ga ai nga ai gaw dai majaw rai nga ga ai. Ndai zawn mayu da ma kahpu kanau nga nna amyu baw hpan masum hku nga pra shachyen shaga sa wa yan mayu dama nga ai amyu lahkawng nga ai yan gaw mayu ngu ai ni kaw nna gaw dama ang ai ni hpe shayi jaw shayi ya nna dama ngu na ni gaw mayu du ni hpe hpu jaw hpu ya rai nna num wawn num la ai lam htung hkying ningli hte nga pra sa wa ai Jinghpaw Wunpawng amyu sha ni rai nga ga ai. Dai hte maren anhte Jinghpaw Wunpawng amyu sha ni gaw mayu dama nga nna num jaw num ya hpu jaw hpu ya nna num wawn num la mayat maya gumja gumhpra law htam nna nga pra sa wa ai htung hkying ningli ni hte lang nna nga pra sa wa ai Jinghpaw Wunpawng amyu ni rai nga ga ai. Dai majaw anhte Jinghpaw Wunpawng amyu sha ni gaw mungkan hta tinang a htung hkying ningli kaba hte nga pra sa wa ai amyu kaba langai mi mung rai nga ga ai law. Dama du ni gaw tinang a shadang sha shadang la sha a matu num wawn num la na rai yang htung hkying ningli nga ai hte maren mayu du ni a dum nta de dama myitsu kanu kawa langai mi gaw dama kasa langai mi woi nna num san hpaga lahkawng hte hpawn mali shata nhtoi kaja ai aten hta shawng nnan num hpyi num san hpang ai hku sa du ra ai mung nga ma ai. Ndai zawn num hpyi num san hpaga lahkawng hte mayu du ni a dum nta de sa du nna dama kanu kawa salang wa hte dama kasa salang ni hte mayu du salang ni num hpyi num san sa ai lam hpe tsun bawngban jahta sa wa ai shaloi mayu du ni mung dama salang yan tsun jahta sa wa ai mungga ni hpe kabu gara hkap tau la ya sai rai yang gaw shan lahkawng gun sa ai num hpyi num san hpaga lahkawng hpe num hpyi num san mahtan hpaga hku nna mayu du ni hpe ap jaw da ra ai nga ma ai. Ndai zawn num hpyi num san mahtan hpaga lahkawng hpe hkap la sai majaw mayu du ni mung dama salang hte dama kasa yan hpe "Num jaw num ya saga ai" ngu nna masat ai nhtu langai mi hpe jaw dat ra ai nga ma ai. Ndai zawn shayi jaw shayi ya na ngu nhtu langai mi jaw dat sai majaw dama salang yan mung "Shayi hpyi lu saga ai" nga nna kabu gara hte mayu du ni hte galoi aten hta mayu du ni hpang de bai sa du na lam hpe nhtoi masat la nna dama salang yan gaw dama ga de kabu gara mani shaga let bai htang wa ai nga ma ai. Numdaw lahkawng hta numdaw lahkawng lang ngu na hta gaw shawng de mayu du ni hte tsun jahta da sai hte maren dama du ni gaw mayu du ni a dum nta de dama kanu kawa tai ai wa hte dama kasa wa gaw mayu dingsa ni num la ahkang jaw ai ngu ai jaw dat ai hpaga gun nna mali shata nhtoi kaja ai aten hta num hpyi shat lit lahkawng hte nri nhtu la ja hpaga gun nna mayu du ni a nta de num hpyi sa du ra ai. Dama kanu kawa tai ai wa hte dama kasa yan gaw mayu du ni a nta de du sai majaw mayu du ni mung kabu gara hte hkap tau la nna mare myitsu hte mare masha ni yawng hpe shaga jahpu nna dama ni gun sa ai shayi hpyi shat lit n-gun ni hpe apyaw alaw sha akyu ara hpyi nna gam lu gam sha ai lam hpe mung galaw nga ga ai. Dama ni gun sa ai shayi hpyi shat lit hpe gam garan sha ngut sai hpang gaw dama salang wa hte dama kasa yan gaw shan gun sa ai nri nhtu hpaga ni hpe mayu du ni hte tsun jahta hpang wa na rai yang num nnan hte la nnan yan num la num wa na yan a myit hkrum ga sadi lik lai shawng galai hkat ai hpang she mayu dama tsun jahta ra ai lam ni hpe tsun jahkrum ma ai nga ai. Num wa num la na yan myit hkrum ga sadi lik lai ni galai ngut sai re majaw dama salang yan gaw shan gun sa ai mayu nsa ja hte shawng de garai nhku yu ai mayu nnan rai yang gaw bwi mung bwi tsa gayen hpaga hte yu sa ja hpe hpawn ap ya ra ai nga ma ai. Ndai zawn mayu nsa ja hte bwi mung bwi tsa gayen hpaga lahkawng hpe ap ya hkap la sai hpang mayu kasa dama kasa lahkawng hpe lata san la nna nri nhtu hpaga hpe mayu du ni hpe ap jaw ap ya ra ai nga ai. Nri nhtu hpaga matsat shing nrai shi hpe ap ya hkap la ngut sai hpang gaw mayu du ni gaw dama du ni hpe jaw ya sai nri nhtu hpe shaman manggala ya ai lam nga ai. Shayi jaw shayi ya ai nri hpe mayu du langai ngai shaman nna dama kanu kawa tai ai wa mung kabu gara hkap tau la sai nga ai. Nri nhtu shaman ya ai lam. Mayu du wa kaw nna dama du ni hpe nri nhtu shaman ya ai lam. "Ya ngai yu dung sumnu hpungsan hkahku wa gaw daina mali ra nhtoi kaja ai shana aten hta anhte a tsawra ai shayi zing hkawn hpe ndai madai hkau ka hte yep kaidu rit pa hte brep di nna dama du ni hpe ap ya dat nngai. Anhte a kanau kasha hkawn tsin hkawn hpa e dama ni a kanu dinghku hta kashu kasha mun mun sen sen shangai chyinghkai nna nga u. Mayat maya law htam nna sama mara nam hpra u madu singkung nan lada bum shagu wan tu hkaraw nhkap shagu jan pru nga mu nga mai mayat maya galu kaba nna nga nga u yaw" ngu shaman dat nngai law. Mayu du ni shaman dat ai mungga dama kanu kawa tai ai wa mung "Au lo yu dung sumnu hpungsan hkahku ni shaman manggala dat ai anhte dama ni mung kabu gara hte hkap tau la saga ai. Mayu du ni shaman dat ai hte maren anhte dama du ni mung daini daina kaw nna gaw ngwi pyaw hkam kaja mayat maya gumchya gumhpra nna nga nga na saga ai lo" ngu nna hkap tau la sai nga ma ai rai. Hpuja hpaga bang ai lam. Nsin ja hpaga bang ai. 1) Shawng na mayu dingsa nrai yang bwi mung bwi tsa gayen hpaga langai bang ra ai 2) mayu dingsa ni kaw hpyi la ai mayu nsa ja hpaga bang ra ai. 3) num san bau bang ra ai 4) hpaw chyaw panyep bang ra ai e malut nhka ginya bang ra ai kumhpa nga bang dat ra ai. Ya gaw nsin ja bang ngut sai re majaw nri nhtu hpaga bang ai lam. 1) Hpu nga kanu bang ra ai 2) hpu bau shi hkam bang ra ai 3) lak hkyik bang ra ai 4) yam hpau lawng bang ra ai 5) hpu sinat bang ra ai 6) magwi kawng bang na 7) nba jung bang na 8) gumhpraw nhkang sa joi bang na 9) nbat raw nba bang na 10) gumhtung gau nhtu bang na hpaga shi tup hte nri nhtu la na. Ngam ai hpaga ni. Shawa nang kachyi latsa shabang malai nga bau lahkawng gumhpraw ru joi num shang ja sinat hpai gup. Lahta na hpaga ni hta sharawt hpaga lahkawng san na. 1) Shingma malai nga 2) bau lahkawng ndai yan gun nna hpang de num nnan hpe sharawt sa ra ai lam rai nga ai. Mun ja hpaga hpe hkungran poi shani hkau ya garai ndaw yang num jaw num ya na aw mun jaw mun ya na ya bai lang jat ai kanu mayan hpe mung jaw ya ra ai. Shawa nang kachyi a lam gaw bai jahkrup hkat wa sana re. Matsing: Ndai shawa nang kachyi latsa a lam hpe ya gaw nau wa nlu bang ai lam hpe mu lu ai. Shawa nang kachyi nlang mat sai gaw nngu lu ai lu su ai ni gaw naw lang nga ai hpe naw mu lu ai. Raitim ya aten law malawng gaw shawa nang kachyi hpe nlu lang ai ni yawng gaw kanu mayan ja kachyi lap mi lap lahkawng tang hpe bai lang ai lam hpe sha mu lu ai. Lu lawm ai ni chyawm gaw shawa nang kachyi hte kanu mayan ja lang ai lam mung nga nga ga ai law. Matut nna anhte Jinghpaw Wunpawng amyu ni num wawn num la yang lang nga ai hpaga ni. 1) Nga wuloi masum bang lang ai bau lahkawng bang lang nga ga ai hpu sinat lahkawng bang lang nga ga ai. Nba lahkyik yam hpau palawng magwi kawng nba jung gumhpraw hkang sa joi gumhpraw ru joi num shang ja hkra nbat raw nba gumhtung gau nhtu shawa nang kachyi kaji kawoi mun ja sumting kanawng hpaga. zmoi prat hkawang lam hta ja hkan mi ya prat hta bai lang ai kanau mayan ja ndai zawn lahta na ja hpaga ni hpe lang nna num wawn num la num jaw num ya rai nna nga nga ai Jinghpaw Wunpawng amyu sha ni rai nga ga ai law. Matut nna nga wuloi masum bang ai lam. Nga langai mi gaw hpu nga nga langai mi gaw shingma malai nga, nga langai mi gaw num sharawt ai shani ju sha ai kumhpa nga ngu nna masat lang nga ga ai. Bau lahkawng lang ai lam. Bau shi hkam hpe hpu bau, bau kaba langai mi hpe bau lahkawng ngu nna masat lang nga ga ai. Sinat lahkawng bang ai lam. Sinat ningbaw hpe hpu sanat sinat nambat lahkawng ngu na hpe sinat hpai gup ngu shamying ga ai. Matsing: Nga kanu bang ai lam gaw ma prat hta kanu yan kawa bau kaba ai majaw kanu yan kawa hpe hkauna htu jaw nna kanu yan kawa hpe bai htang bau ai rai nga u ga nga ma ai. Hpu sinat bang ai lam mung ma ten hta kawa ni shan hkwi jaw nna bai kaba da sai majaw kanu yan kawa shan bai gap sha na matu bang ai nga ma ai. Nba jung lak hkyik palawng ni bang ai lam mung ma ten hta bu hpun nba hpe bu hpun sai majaw kanu yan kawa hpe bai htang jaw ai nga ma ai. Nbat raw nba bang ai mung ma prat hta nbat hte ba nna kung kaba ai re majaw ma nbat bai htang jaw ai nga ma ai. 5) Hpu bau kaba bang ai lam mung ma ten kanu a chyu lu nna kaba wa sai majaw kanu a chyu malai bang ai nga ma ai. 6) Kumhtung gau nhtu bang ai lam mung shangai daidaw yang shadai kadoi shinggren kauk nhtu hpe bai htang jaw ai nga ma ai. 7) Num nnan san sa yang gun ai hpaga lahkawng hpe mung nri nhtu hpaga hta bai sawn bang ra ai nga ma ai. Matut nna num sharawt shat lit bawn ai lam. Mayu du ni hpang gun sa ai shat lit. 1) Shat nbaw bang ai shingnoi langai 2) shingnoi lahkawng ngu na hta bang ai u kaba lahkawng hpe u hkrawng mayawn lahkawng udi hte shapre makai mayawn lahkawng makai mi hta shapre hte udi mali mali makai mayawn lahkawng rai ra ai. Nga chyu bu lahkawng coffee bu kaji lahkawng coffee htuk kaji lahkawng jumdwi htuk lahkawng jum kumhpa shanam hte nga jahkraw lit di kumhpa langai shawng de san da ai sharawt la hpaga lahkawng gun nna num sharawt la na. Dama du ni num sharawt la hpaga lahkawng hte sharawt la shat lit gun nna num sharawt la sa du sai majaw mayu du ni mung tinang a kajan hpe mayu ni kungdawn hte hpawn rai sharawt ya ra ai lam nga ai. Mayu du ni kaw nna tinang a kajan hpe kungdawn dawn dat ai lam. 1) Mayu npawt ni a kungdawn lit kaba hta num labu lahkawng num palawng lahkawng baw bam lahkawng ningwawt lahkawng ndi kasha lahkawng shat ban lahkawng lakung lahkawng nba tawng lahkawng lahkawn jaw dang shagyi chyinghkrang nai rawng nai mam hkai nmai tum ni hkum hkra hte nhtu lahkawng bang nna bawn ra ai. Kaga shingnoi langai mi hta gup bang nra ai langai ngai sha gun nna bang ra ai. Shingnoi bawn ai nrai ai mayu kungdawn ni. Ndi kaba lahkawng hkra lahkawng nhtu nri nhpye hte n-ga pahkap nba langai ndai hta nlawm ai kaga kungdawn ni mung hkum hkra bawn nna dama du ni hpe num sharawt ya ai lam mung htung hkying ningli kaba langai mi rai nga mali ai law. Ndai zawn mayu du ni kaw nna mayu a sharung kungdawn rai ni hpe jahkum shatsup nna num sa salang mayu salang mayu kasa salang ni hte rau dama ga de num hkungran na matu du yang dama du ni gaw mayu du ni hpe hkring sa shanu nga na matu dama nta hte nau wa ntsan ai shara hta nta kaja hta shanu hkringsa nga shangun nna mayu du ni hpe ra nrawng hkra gawn lajang ra ai nga ma ai. Dai hta dama ni gaw mayu du ni hpe malu masha sha chyai hpa lang nna shachyen shaga sa ra ai. Bai la nnan wa mung la manang ni hte lu chyai sha chyai hpa hte hpawn rai nna num nnan ni hpe shachyen shaga sa ra ai nga ma ai. La nnan wa gaw mayu du ni hpe mung hkungga la ra shachyen shaga ra ai nga ma ai. Moi nat jaw prat hta gaw hkungran poi shani gaw la nnan wa a npan ndaw hta num shalai kum bang ni law law jun tawn nna kumbang numhpang makau hta jahtai kaba nyep da ai hta num nnan ni dung na matu lahkum ni hpe mung lajang da ma ai nga ai. Num nnan jan gaw dai lahkum hpe kagu karat daw ang ai wa langai mi gaw lahkum ni hpe kahtap nna dung nga ai nga ai. Dai lahkum ni hta num nnan ni dung na rai yang kumhpa kaji kajaw jaw chyai yang she num nnan ni dung na matu atsawm sha lajang da ya ai hta she bai num nnan ni dung nga ai nga ma ai. Num nnan ni yawng jahtai hta rai ndung yang jahtai kaba nyep da ai hpe shanhte lang ai nri nchyawng hte lahkawng masum lang galun waw ai hpang she lajang da ai lahkum hta dung ma ai nga ai. Kumbang nhpang hta wa htau na matu langa jun da ai hta wa htau yang nhtu kaga ga hte she wa htau ra ai nga ma ai. Dai yang wa htau lang ai nhtu ni hpe dama ang ai ni kashun kashe rai nna hta la ra ai mung nga ma ai. Num nnan ni kumbang lai na matu kumbang jun da ai kumbang hpawng ka-ang hta kawa tawng kaba langai mi kumbang ka-ang ga nna bang da ya ai hta gau lai shangun ma ai. Kumbang lai ngut ai hte num nnan jan a baw ntsa hta uhpum u kanu hpe shadun ya yang grai na na rai u ndung yang mung kaja ai. Bai nna dama ni a nta de pyen shang wa yang mung grai kaja ai ngu sawn la ma ai. Shingrai num nnan jan kumbang lai ngut jang gaw nta nhku de shang wa na rai yang myit su kamoi langai ngai hku nna kachyi gaili hte du gup di nna nta nhku de dun shang wa nna dupnu dap hpe mali lang grup di nna woi dun shinggrup woi nna she shakawng panyep hta hkring sa nga shangun ra ai mung nga ma ai. Num nnan jan gaw wan dap hta wan wut nna ndi kaba dun nna num nnan jan di kaba hta hka dat bang ai shaloi ndi kaba na hkra lahkra hku kayun yang gaw shadang la sha shawng lu ai nga nna lapai hku kayun yang gaw num kasha shawng lu na re ngu ai hpe mung tsun la chye ma ai. Num nnan hpung ni nga na matu dupnu dun nbang kaga shakawng panyep kaba nyep da ya ai hta nga nna ra ai lam ni hpe galaw nga ma ai nga ai. Ya gaw num nnan hkungran ai lam hpe ngut sai majaw mayu du ni hpe jaw ya ai hkau jaw hkau ya hpe sharung kungdawn hta hkan nna hkau jaw hkau ya jaw nna kaji mun ja hpe mung jaw ra sai. Ndai zawn hkau jaw hkau ya ni hte kajum kaji mun ja hpaga ni hpe mung jaw shangut kau sai nga ma ai. Hkau jaw hkau ya hte kaji mun ja jaw ngut sai hpang mayu dama lapran hta tsun hparan lam ni yawng ngut sai majaw mayu kasa dama kasa yan hpe wa shanting ka hpe wa shanting kanawng ja hte hpawn mayu du ni hpe wa shanting ka lahkawng hpe ap sa shangun dat sai nga ma ai. Wa shanting ka ap ya ai hkap la sai hpang gaw mayu du ni gaw dama ni a dum nta de rapdaw bye na matu mayu salang lahkawng gaw nhtu langai hpra lang nna rapdaw bye sa mayu salang langai mi gaw tinang a kajan hpe sharin shaga da ai mungga tsun nna salang langai mi gaw dama du ni hpe galu kaba mayat maya nga na matu shaman da ai mungga tsun da ai hku rai nga ai. Wa shanting ka lahkawng bawn ai lam. Nambat langai wa shanting ka langai mi hta gaw wa lagyi hte wa lagyi hpya na nhtu bai hkinnam ngu ai nba yan langai bang ai ka re. Nambat lahkawng wa shanting ka hta gaw shat nbaw makai kaba lahkawng nga chyu bu lahkawng coffee htuk lahkawng jumdwi htuk lahkawng bang nna sumting kanawng hpaga ja htaw wutang malai lap mun manga shing nrai sen mi hta wa shanting sa ap ya ai lam htung hkying ningli nan nga nga mali ai. Num nnan jan num nnan hpa jaw ai lam. Hkungran ngut sai re majaw gaw ya gaw num nnan hpa jaw ai lam hpe hti dan na. Moi na nat jaw htung hkying nat gun ni jaw nna kumbang shalai hkungran ai hpang num nnan jan gaw num nnan hpa di kaba shadu nna num nnan hpa jaw hkawm ra ai. Num nnan hpa jaw na rai yang kamoi myit su langai ngai woi nna shachyen shaga ya let num nnan hpa jaw sa hkawm ra ai. Hpa jaw yang kagu yan kamoi hpe shawng jaw hpang ra ai. 1) Kagu kaba hpe hpa jaw sha na matu nba tawn hte jaw ra ai. Kamoi kaba hpe hpa jaw yang num makang shing nrai num ningwawt kaja hte hpa jaw ra ai. 3) Kaga kagu karat ni hpe jaw yan hpa dinghkang hta gumhpraw lap gyap hte hpa jaw ra ai. 4) Kaning kasha ni hpe hpa jaw yang num arai palawng shing nrai hpajet zawn rai ai ni hte hpa jaw hkat ra ai. 5) Kashu kahkri ni hpe hpa jaw yang gumhpraw kap gyap hte hpa jaw yang mai ai. 6) La nnan wa hpe hpa jaw yang da da ai nba tawn hte hpa jaw ra ai. Bai kagu kaba hpe gaw num nnan jan wa hpye wa ai pakap nba hte jaw ai mung nga ma ai. Num nnan hpa jaw ai lam hta kamoi myitsu jan woi nna shachyen shaga hkawm let num nnan hpa shalu hkawm ai re nga ma ai. Matut nna num nnan hpe langi ngi ai lam. Num nnan jan hpe langi ngi la ai lam gaw num nnan jan hpe ra nrawng hkra sharin shaga la ai lam hte num nnan hte la nnan yan hpe shada da tsawra mahku jahkau hkat ai lam mung rai nga ai. Dai majaw num nnan langi yang lawu na ga ni hpe tsun nna langi ngi ai nga ma ai. 1) "E law e moi gaw law nam shayawn nampan mung law rau ma e nga e e moi gaw law e manawn yawn sumpra mung law hkau ma e nga e bung yawng chying hkang mung law rau nga e nga e e hkanu yan hka shi mung e law hkau ma e nga e shanung yawn shana mung e law rau nga e nga e kagu yan kanoi mung law law hkau nga e nga e ndai zawn rai nna dinghta wa yang ga mung e yawng hpring sai nga le nga e mungga na ga mung ndai hku nna she yawng chying wa sai le nga e nga e nga e ya chyawm gaw law e nhtuk ai lam yan ni ang yang gaw n-yaw sha myi man mau yaw yin sha shingdu e lau rai man e nga e la nnan wa gaw le ja htu sha sumbang e tawn di nu e nga e ya gaw law e num nnan jang mun law e shan rawng sha dang bang e ngawn di na me hkap la nu e nga e e ya gaw law e ndai zawn rai shakawng sha panyep hta e law chying nga sai nga nga ma e nga". Num langi la ngut sai hpang shani gaw shakawng shat jam sha ai lamang sha rai sai. Ya gaw num langi mung ngut rai nna yup na hpang shani gaw num sa ai mayu ni num sa sa ai num sa manam ni yawng wa mat na jahpawt manap hta e hpang jahtum num hkungran ai lam hta e ndai shakawng shat sha ai lamang gaw hpang jahtum langai mi re majaw gaw ndai shakawng shat sha ai lam gaw moi ji jaw nat jaw ai aten hta num wawn num la ai lamang hta na gaw jahtum na shakawng shat sha nna shalu shala hkat chyai ai lamang kaba langai mi rai sai. Ndai shakawng shat n-neng hpe udi hkai tsu u shan ni hte grai mu hkra n-gawt kaba hta kajam gayau lajang tawn da ai shakawng shat n-neng ni rai nga ai. Ndai shakawng shat hpe kagu karat kanam ni daw ang ai num sa manam mahkawn ni hte dama shabrang ni shada da shala hkat ai let sha ai shakawng shat rai ai. Shakawng shat sha yang shada da shalu shala hkat chyai ai aten hta kadai jan kadai wa mung grai wa pawt sindawng hkat ai lam mung nmai ai hku chyai hkat ra ai nga ma ai. Shat n-neng hpe kum yawn lang nna langai hte langai n-gup de bawt jaw let apyaw sha mani sumsai hte lu chyai sha chyai ra ai htung hkying nan mung rai nga ai nga ma ai. Ndai hkungran lamang hta gaw kagu karat kanam ngu na ni shakawng shat sha nna shalu shala hkat pyaw chyai ai lam gaw num hkungran ai lamang hta gaw hpang jahtum galaw ai lamang shingdim langai mi rai sai law.

Matsing na matu e anhte Jinghpaw Wunpawng amyu sha ni mayu dama kahpu kanau ni shada da shat lit gun jaw yang shat lit bawn ai lam gaw shara hte shara hkan nna loili shai ai lam gaw nga ang yang nga na re. 2) Mayu kajum kaji ni hpe shat lit gun jaw yang gaw shat lit bawn yang lang ai ni yawng hkum hkra bang nna shat lit bawn ra ai nga ma ai. Raitim mayu du ni kaw nna dama kashu kahkri ni hpe shat lit bawn gun jaw yang gaw udi hte shanam gaw nmai bang gun jaw ai nga ma ai. 4) Mali hkrang walawng kashu ma la yang hkawang lam nga nna ja hkan bang ra ai nga ai. 5) Jan shang hkran ni kashu ma la yang gaw moi shawng de nanhte hpe she ja hpaga gun jaw yang daini gaw kashu ma la na rai yang shingkrang htang hpaga ngu ai hpaga lahkawng hpe shawng bang ra ai nga ma ai. 6) Moi shawng de shawa nang kachyi latsa bang yang gaw kai tawng manga shi hpe gaw kundawn ngu bai htang jaw ra ai nga ma ai. 7) Hkaujaw hkauya jaw hkat ai lam gaw sharung kungdawn dan ai hta hkan nna hkau jaw hkau ya htu hkat ra ai lam kaja ai. 8) Sharung kungdawn ni ndawn lu tim mayu kaji hpe gaw mun ja hpaga kaba langai mi jaw ra ai lam htunghkying nga ai. 9) Shawng na mayu du wa a dama ni kaw kaga masha langai mi shayi shadun yang gaw shawng na mayu wa hpe kungdawn ndawn tim "Anhte a dama rum sai" ngu ginrung hpaga langai mi garan jaw ra ai lam mung nga ai. Numwawn numla hpuja hpaga bang ai lam hta la ai lam ka lajang da ai lam gaw ndai hta ngut mat sai re law. Grai chyeju kaba sai.
Origination date 2017-02-04
Origination date free form
Archive link https://catalog.paradisec.org.au/repository/KK1/0443
URL
Collector
Keita Kurabe
Countries To view related information on a country, click its name
Language as given Jinghpaw
Subject language(s) To view related information on a language, click its name
Content language(s) To view related information on a language, click its name
Dialect Standard Jinghpaw
Region / village Northern Myanmar
Originating university Tokyo University of Foreign Studies
Operator
Data Categories primary text
Data Types Sound
Discourse type narrative
Roles Keita Kurabe : depositor
L. Tu Awng : speaker
DOI 10.4225/72/598895adcc206
Cite as Keita Kurabe (collector), Keita Kurabe (depositor), L. Tu Awng (speaker), 2017. Wunpawng sha ni hkungran ai lam (The marriage of the Kachin people). EAF+XML/MPEG/VND.WAV. KK1-0443 at catalog.paradisec.org.au. https://dx.doi.org/10.4225/72/598895adcc206
Content Files (6)
Filename Type File size Duration File access
KK1-0443-A.eaf application/eaf+xml 117 KB
KK1-0443-A.mp3 audio/mpeg 33.5 MB 00:36:41.440
KK1-0443-A.wav audio/vnd.wav 1.18 GB 00:36:41.420
KK1-0443-B.eaf application/eaf+xml 11.9 KB
KK1-0443-B.mp3 audio/mpeg 2.3 MB 00:02:30.936
KK1-0443-B.wav audio/vnd.wav 83.1 MB 00:02:30.913
6 files -- 1.3 GB -- --

Show 10 Show 50 Show all 6

Collection Information
Collection ID KK1
Collection title Kachin folktales told in Jinghpaw
Description Recordings of Kachin folktales and related narratives in Jinghpaw. These materials were collected by Keita Kurabe, Gumtung Lu Awng, Sumdu Ja Seng Roi, Hpauhkum Htu Bu, Labang Tu La, Gumtung Htu Nan, and Lashi Seng Nan as part of community-based collaborative fieldwork in northern Myanmar. A total of 2,491 stories with 2,481 ELAN files, 2,481 transcriptions, and 1,369 translations are currently available (March 25, 2024). Transcriptions were contributed by Gumtung Lu Awng, Pausa La Ring, Galang Lu Hkawng, Sumdu Ja Seng Roi, Hpauhkum Htu Bu, and Keita Kurabe. Stories were translated by Nbanpa Rita Seng Mai, Sumlut Gun Mai, Lazing Htoi San, Maran Seng Pan, Dumdaw Mike Tu Awng, Nhkum Htoi Awng, and Keita Kurabe.

Animated stories are available at:

https://catalog.paradisec.org.au/collections/KK3
https://www.youtube.com/@kachinfolktales
https://www.facebook.com/KachinStories

Other Kachin culture and history are available at:

https://catalog.paradisec.org.au/collections/KK2

Our research was made possible under the support of JSPS KAKENHI Grant Number JP17H04523, JP20K13024, JP20H01256, Linguistic Dynamics Science 3 (LingDy3) from Research Institute for Languages and Cultures of Asia and Africa (ILCAA), Tokyo University of Foreign Studies (TUFS), and JSPS Program for Advancing Strategic International Networks to Accelerate the Circulation of Talented Researchers "A collaborative network for usage-based research on lesser-studied languages."
Countries To view related information on a country, click its name
Languages To view related information on a language, click its name
Access Information
Edit access Nick Thieberger
Keita Kurabe
View/Download access
Data access conditions Open (subject to agreeing to PDSC access conditions)
Data access narrative
Comments

Must be logged in to comment


No comments found