| Description |
Transcription (Htu Bu)
Ya ngai bai hkai na maumwi gaw, Nhpye Shap Ai Shu A Maumwi re. Moi shawng de da, ndai dusat ni hte shinggyim masha ni hte e ga naw hkrum ai ten, dai aten na maumwi re. Dai ten hta e da, ndai nawng kaba langai mi ma nga ai da. Shara langai mi kaw gaw, dai nawng hte n tsan ai kaw sha, Mare langai mi ma nga ai da. Dai kaw gaw, dai nawng kaw na Shu langai mi wa she, Shu shabrang ngu na, Shu la shabrang kasha dai wa she, Dai wa wa she, ndai shinggyim masha zawn rai na tai wa wa re da. Shi dai hku tai wa...re wa re majaw gaw, dai kaw na, dai kahtawng kaw na, dai mare kaw na, num kasha langai hte shi sumtsaw byin ai da. Sumtsaw byin re, re majaw gaw, shi gaw galoi mung num sha dai hte e e, kanawn ai i..hpa galaw tim rau, rai na. Num sha dai sa ai de shi mung hkan nang sa sa re ai da. Lani mi na ten hta gaw shi, aw, ndai kalang mi na gaw ndai num mahkawn gaw, shanhte... shinggyim masha ni i... Manau kaba langai mi nga ai da. Manau nga dai shaloi gaw, Manau sa na ngu jang e she, ndai Shu shabrang ndai wa mung, "Ngai mung hkan nang na." ngu nna dai hku tsun ai da. Dai shaloi gaw, "Ngai nhpye chyom me n lu ai law." ngu shing ngu jang she, Ndai num mahkawn gaw, shi na dai Shu shabrang ngu na wa hpe, Shi sumtsaw wa hpe nhpye ni lajang ya rai na she, Shanhte Manau sa manau ai da. Manau sa manau rai ma ai da. Dai ngut nna bai wa re, dai hpang e she, ndai shabrang ndai hpe gaw ayan n mu mada ai da. Kalang lang she shi kaw sa wa wa re ai da. Dai majaw shabrang dai gaw, Shu re majaw she, aw ra shi Shu manang ni hpe de, la-ing de bai wa mat mat rai na hku nga. Dai majaw she, shi na Shu manang ni hpang de wa ai shaloi gaw Shi gaw, shi na Shu manang ni gaw tsun ai da. "E, nang shinggyim masha ni hpang de Manau sa ai wa grai pyaw ai i? ngu na dai hku tsun yang, "Grai pyaw ai. Shinggyim masha ni gaw grai pyaw hkra she galaw nga ma ai." Manau kaw she masha Myu hkum sumhpa dai hku na hkrum hkat ai hte yawng hkra grai pyaw nna jawm ka rai na galaw nga ma ai." ngu na tsun ai da. Dai shaloi gaw ndai Shu manang ni gaw i.. "E, anhte Shu amyu ni mung Manau galaw ga le." ngu na tsun ai, tsun wa ai da. Dai shaloi gaw, "Anhte mung galaw ga." nga wa ai shaloi gaw ndai shabrang wa mung tsun ai da "E, mai ai le. Anhte mung galaw ga le. Anhte Shu ni mung galaw ga." ngu "Raitim, ngai nhpye n lu ai law." ngu dai hku tsun ai da. Shaloi jang she ndai Shu manang ni mung "Nhpye gaw anhte mung n lu ai gaw. Nhpye gaw na sumtsaw jan kaw shap u le." ngu dai hku tsun ai da. E dai hku tsun jang she, "Mai ai. Dai hku nga yang gaw ngai wa shap na yaw." ngu dai hku tsun ai she, Ndai kaja wa nan, lana mi gaw ndai shabrang wa gaw, ndai shi na mahkawn jan kaw bai sa wa sai da. Shaloi jang she, "Yi, ngai nang hpe lama mi tsun mayu ai law." ngu, shing ngu jang she, aw ra mahkawn jan gaw, "Tsun u le. Mai byin ai hte sha gaw lajang ya na." ngu na dai hku tsun rai jang she, "Karum hpyi mayu ai." ngu da i. Shaloi jang "Mai byin ai hte daram sha gaw karum na." ngu tsun rai jang she, "Ngai Manau poi sa na, Manau poi kaw lawm na matu nhpye shap mayu ai." ngu na tsun dai da. "Gara de na Manau mi? Ngai mung sa, hkan nang na le." ngu jang she, "E le, ya hpang e bai tsun dan na." ngu na dai hku na tsun ai da. Nhpye bai galaw san nga ngu yang mung, Nhpye n kam shap ya ai nga na hpe tsang rai na she, ndai shi na sumtsaw jan gaw dai shabrang wa hpe Nhpye shap kau dat ya ai da. Shi na Nhpye shap dat ya rai, shi mung grai chyeju kaba sai, grai kabu na wa mat. Rai yang she, kaja wa nan hpang shani rai jang gaw, hpang shani rai jang gaw ndai e, num kasha ndai wa she, Wa shat di sa nna she dai nam de bai sa dai da e. Dai nawng makau de bai sa wa rai yang she, Koi dai nawng kaw wa she, shi Nhpen zawn re wa she dai nawng kaw wa mara taw, waw taw nga sai da. Dai waw taw nga jang she, shi gaw "Koi aw ra gaw nye Nhpye hte bung bung san re wa. Gara hku gaw byin taw nga ai kun." ngu na she shi gaw atsawm sha yu ai da. Atsawm sha yu rai na she, re kun n re kun ngu na she, shingna hte mala la nna she atsawm sha yu ai da. Dai shaloi she, shi na Nhpye rai taw nga ai majaw, la mat wa ai da. Dai shi, dai mala yu ai dai shaloi gaw dai Nhpye hkan e wa she Shu ni wa kap taw na hku rai nga. Dai wa she, shi gaw Nhpye dai hpe la mat wa ai da. La mat wa na she shi gaw shi na, shanhte na wang, nta makau kaw e bai wa lam da. Dai she, shana rai jang gaw dai shabrang dai bai sa wa sai da e. Dai she, shana rai jang gaw dai shabrang dai bai sa wa sai da e. Shabrang dai bai sa wa na she, dai num mahkawn pyi naw hpa pyi n ngu shi yang she, "Nang gaw hpa baw galaw ai mi? Hpa baw, hpa rai na dai hku galaw ai mi?" ngu na sa tsun ai da. ngu na sa tsun ai da. "Ngai hpa baw rai nga ta?" ngu jang she, "Anhte, ngai shap lang ai Nhpye me, manang ni Manau kaw lang taw nga ai hpe mi, sa kashun mat wa ai gaw." ngu na dai hku tsun ai da. Shing ngu jang she ndai num mahkawn mung, "Nang hpa baw rai na nye Nhpye hpe e nawng kaw sa kabai bang da ya ai mi? ngu na dai hku bai tsun ai da. Shaloi jang e she, ndai la wa rai jang gaw, shi gaw kade n na ai gaw ndai shingyim masha tai na hku gaw rai sai, lam hpe e, shi myit hta e tsun dan na ngu na myit hta sha naw rawng ai wa she, kaja wa n-gup de wa mi she, "Ngai gaw, Shu re majaw gaw, Manau galaw yang mung nawng kaw sha, hka nawng kaw sha mai galaw nga gaw." ngu na tsun shapraw kau dat ai da. Dai kaw na she, "Aw, nang ngai hpe e Shu rai nga ninglen shingyim masha hku na ngai hpe sa masu sha ai i!" ngu na she, num dai mung, dai Shu hpe "Lawan wa su." ngu na dai hku na, gawt kau dat jang she, Shu mung dai la-ing de bai shang mat wa, ndai num mung shi gaw hkrap ai hte kaya ai hte rai mat na she, nhku de ga gat bang mat wa rai na dai hku na shan lahkawng mung hka mat sai. Shing rai na ndai num jan gaw da, dai kaw na gaw galoi raitim, kadai shabrang wa hpa sa nga tim, shi gaw masu sha na hkrai shadu mat nna shi prat tup hta e la n la ai, num n wa ai dai hku sha nga mat ai da. |
