| Description |
Ya ngai tsun na maumwi gaw uhku a lam re. Uhku gaw hpa rai na me shani gaw yup taw nga nna, shana she tam sha ai ngu hpang ngai tsun na nngai. Lani mi na aten hta uhku ngu ai dusat gaw nsam u ni hpang nsam chya ya nna kan bau bungli hpang galaw ai shara langai mi re. U ni gaw shi kaw bai chya la bai pyen mat, manau ni nau la bai wa. Bai ntsawm mat jang bai chya la re na utawng ni hpa ni mung dai kaw sha chya la re na manau ni rau re na dai hku nga ma ai da. Lani mi na aten hta uhka ngu gaw ahpraw hte atsit wa su la na manau wa nau ai da. Nau re jang e hkau uhka ndai ahpraw hte atsit nsam ngu gaw a tsit gaw nang hkau u tawng na nsam lawm mat sai gaw. Ahpraw ngu gaw hka u na nang hkau hka u na nsam lawm mat sai. Dai majaw nang laga wa pau la su ngu na bai dat dat ai da. Dat dat re shaloi she dai uhka gaw lagawn na she nsa chya sai da. Lana mi yup kau re na she kade nna re shaloi bai sa wa sai da. U hku kaw e hkau u hku nye ndai lang gaw amaw nsam hte lamu tsit nsam bai chya ya myit le ngu da. Chya ya sai da, chya ya re na she manau bai wa nau la sai da, wa nau la re na she bai sa wa re na ntsawm mat jang bai shakya la ai da, ndai lang gaw ahpraw nsam hte achyang nsam bai chya la re na she bai sa sai da, bai sa wa nau ai shaloi gaw u ni jawm ashu da ai da. U ni wa e hkau nang wa nhpa re na me ahpraw rau achyang me chya ai gaw, ahpraw ra ngu gaw ahpraw nga yang gaw ahpraw san san chye yang she tsawm ai gaw ngu na tsun ai da. Dai shaloi uhka gaw tsun ai da, nye hkai mi hpa mi chya chya nanhte rau hpa nseng ai ngu da. Hpa nseng ai nanhte manawn yang manawn ai ngu na dai hku u hka gaw bai n htang tsun ai. N htang tsun re shaloi nta wa sai da, nta wa re shaloi shi nu shi wa ni wa tsun ai da. A nu a wa ngai dai ni manau nau sa ai shaloi hkau hka u hte hkau u tawng gaw ngai hpang dai hku tsun ai re ngu na tsun ai da. Dai shaloi shi nu yen shi wa gaw hpaji jaw dat ai da. Ma e nang gaw lagawn ai, galoi ma nkam sa chya la ai majaw kalang mi chya da jang galoi ma bai n chya ra ai baw nsam wa chya la su yaw ma ngu na hpaji jaw ai da. Hpang shani du ai da, hpang shani du tim lagawn na nsa chya re na she nta kaw dai hku sha nga re na bai re sai da. Hpang jahpawt nga yang machyi mat ai da. Shi machyi mat re na bai nsa chya byin mat sai da. Bai nsa chya byin mat re hte shi gaw hpang jahpawt nga hte sa chya byin sai da, sa chya re shaloi e hkau u hku nang le galoi mung kalang mi chya da yang galoi mung n prai ai hpan tsi nang chye gin shapraw ai i ngu na san ai da. San re shaloi u hku gaw tsun ai da, ngai naw myit yu na ngu da. U hku wa gaw hpaji mung rawng re na lana mi myit yu re na hpang jahpawt nga hte uhka nta sa re na hkau u hka ngai chye sai ngu da. Nang gaw uhka re majaw nang gaw a chyang re yang akyu rawng ai ngu da. Hpa majaw i nga yang nang sa tsu ni hkan hta sha hkawm ai shaloi a chyang re yang gaw nang gaw nam sumwum hkan shang mat yang masha ni nmai mu ai. Dai majaw nang achyang gaw htap htuk ai, nang rau a chyang rau gin dan ai ngu na dai hku tsun re na she uhku mung shi na tsi lu dut na matu dai hku masu sha re na uhka gaw hkap la. Hkap la re na she hpang jahpawt wa su na yaw, dai na gin da rit ngu na tsun ai da. Uhku wa shana tup gin sai da, hpa baw rau gin ai i ngu yang hkum puk achyang rau masha ni galaw da ai gat dara gayau ai da. Gayau re na she gin shapru da sai da. Hpang jahpawt nga hte uhka gaw sa wa sai da. E hkau u hku mana gin shalat da ai tsi lu sai i ngu na san yang, lu sai lu sai hkau u hka nang sa wa ngu na shi gaw dai uhku gaw sumpan ahpraw re makau hku grup yin pat da ai rau kata de woi shang mat ai da. Kata de woi shang re na su hkrai su, su hkrai su kaning hku byin wa ai mi re shi mung nchye, su hkrai su re na she grai tsawm sai, hkau u hka, oh ra jan kaw jahkring mi wa lam kau ngu na wa lam shangun sai da, wa lam re yang na wa re yang hkraw mat re na she e hkau u hku tsawm ai i ngu san yang mung uhku mung tsawm ai tsawm ai sha ngu ai da. E hkau u hku ndai tsi gin ai kade ram ba mat sa ngu, mana tup yup pa nlu ai ngu na masu sha ai da. Kade ram ma ai rai ngu yang hpu hpu hpyi la manu jahpu mung hpyi re na she dai uhka wa shi nu shi wa kaw sa sai da. Shi nu shi wa ni kaw sa jang she uhka gaw tsun ai, shi nu shi wa hpe e nu ntsawm ai i ngu na wa san yang, Shi nu ni gaw mau sai da, e ma nang na gaw hpa rai na achyang hkrai byin taw ai rai ngu na san yu yang, Nre hkau u hku she achyang hte htap htuk ai nga na nu i htap htuk a ni ngu na san yang she n htap htuk ai, kaja nan nan ntsawm ai kachyi mi pa ntsawm ai. Nkam yang pat wa yu ngu na pat wa shangun ai da, wa yu shangun ai shaloi yu dat yang achyang re na myi gaw tu tu re na kaja ntsawm taw ai da. Dai kaw na pawt na hkau u hku hpang sa tam yang hkau u hku gaw htawt mat sai da. Sumwum langai mi kaw htawt mat, dai shani kaw na uhka gaw u hku hpang hkan tam hkan tam re na uhku mung shani re yang gaw shinggan npru na dai nam sumwum kata kaw yup taw nga nna shana re yang she tam lu tam sha pru ai lam re ngu na ndai ram ginchyum dat nngai. |
