| Description |
Ya ngai tsun na lam gaw ya na ndai prat kaw hpa na sha lawa hpang nmu mat ai lam hpang ngai tsun na nngai. Moi shawng de madu jan hte madu la langai kaw ma langai mi lu ai. Dai ma gaw kaji ai kaw na shi nu yen shi wa ma matsan ai shi ma matsan ai. Dai majaw shi gaw lagawn ma lagawn ai, shi nu yen shi wa na ga n madat ai. Dai majaw shi gaw lani mi na aten hta masha ni na nta de wa chyai ai shaloi shi gaw npu kaw na ja rai langai mi mu hta na she shi gaw nta de la wa hkrup mat ai. Nta de la wa re shaloi shi gaw shi nu yen shi wa e wa jaw ai. Ma nang shi nu yen shi wa gaw tsun ai, ndai ja gara kaw na la wa ai rai nga san ai, shi gaw oh masha ni na nta npu kaw na mu hta la ai. Masha ni na nta npu kaw na mu hta la na ngai hta wa ai re nu ngu yang, masha ni na nta npu kaw na rai mu hta la yang masha ni e jaw kau da u le. Hpa re na me la wa ai ma nang myit nsu ai, lagawn mung lagawn ai shangun ai mung n madat ai, nang gaw dai ni gaw shingna nan nan hkrup sha na nga na shi nu gaw gayet ai. Gayet re na she shi gaw dai shani shi hkrap na shalu mat ai. Shalu re na shi gaw shang hkawp mung hpai re na janghkyen mung hpai re na she bapa chyayet 7 daram gun mat ai. Re na she paba chyayet dai gaw din ma din ai. Din din re na she bapa chyayet dai ma gun re na shi gaw hkawm hkawm, dingla langai mi gaw mu. E dwi la ya ngai oh lungpu langai mi lam kaw shingbyi di na nye nu adup na ngai nang de hprawng wa ai ga re, shalu na nang de sa wa ai ga re ngu yang lungpu gaw le ra maga de nga na re. Sa wa ngu yang sa sa sa re, dinggai langai mi rau bai hkrum re na she dai dinggai hpe san yang, A dwi lungpu langai mi dang nmu ai i ma shingbyi na ngu san dat yu yang, Oh ra maga de nga na re ngu, bai hkawm hkawm hkawm re na she shabrang langai mi rau shi na kahpu na ram re kahpu kaba ram re shabrang langai mi rau bai hkrum na ahpu nang de lungpu langai mi nmu da ai i. Ngai dai kaw shingbyi na ngu. Le ra maga de nga na re ngu na hkawm hkawm re shaloi lungpu langai mi hpe mu re na dai kaw shang re na shi gaw wanjang ma jang da re na dung taw nga re na shi nu shi wa ni gayet ai sumru yu re na shi kaning hku ni yawn re na shi gaw hkrap ai. Hkrap re na she shi kade nna jang yup pyaw mat rai, yup mang kaw wa sha lawa langai mi shi e wa tsun ai da. Nang kaning re na ngai na shara de du wa ai rai. Nang hpang ngai nju ai, nang rau ngai hpaji shingjawng na ngu na yup mang jaw ai shaloi shi rawt wa ai da. Rawt wa re hte shi gaw myi hpaw dat yu yang sa lawa kaba law langai mi gaw shi man kaw di di nga taw nga ai da. Shi man kaw di di nan nga taw nga re jang, nang rau ngai hpaji shingjawng na i ngu na shalawa wa tsun ai da. Dai matsan ma gaw bawnu ma zen re da. Kajawng mat re na bawnu zen re di shi hpa ntsun shi ai. Hpa ntsun shi re na she shi myit yu ai da. Shi gaw bawnu ma grai kaja ai, dai majaw shi myit yu re shaloi shi masat masa langai hpang lu gying shapru kau dat ai, dai masat masa gaw shi kaw lawm wa ai bapa chyayet chyinghkyen, shanghkawp dai ni hpang shi akyu jashawn na dai shi lu myit shapru dat ai. Shi tsun ai nang rau ngai shingjawng ga nga yang ngai tsun ai hku nang hkan ra ai, ngai tsun ai poi langai mi hpang an yen 2 shingjawng na re ngu yang, Shalawa gaw ahhah nang san re masha hpe me ngai ndang na lam nan nnga ai ngu yang she dai masha wa gaw tsun ai da. Sa wa le, hpang e she chye na ngu na masha wa gaw tsun sai da. Nambat langai hku na nang rau ngai n lung din sha shing jawng ga ngu da. Nlung din sha shingjawng ga ngu yang shalawa wa gaw shi nlung din nlu sha tim masha wa nlu sha na re ngu hku shadu na shi gaw mai ai le ngu na hkap la kau ai da. Hkap la kau re na matsan ma dai gaw shi na htingpa kaw na bapa chyayet 7 hpang shaw shapru dat ai. Shaw shapru rai, ngai ndai nlung din hpang sha na nang gara nlung din hpang sha na rai ngu tsun dat ai shaloi sha lawa wa gaw ngai ndai nlung din hpang sha na ngu na n lungdin kaja nan nan hpai dat ai da. Hpai dat rai sa wa hpang sai yaw ngu da. Hpang sai yaw ngu tsun dat ai shaloi she shalawa wa gaw sha dat ai da. Sha dat ai hte wa 4,5 daram kalang ta daw mat na hkrat wa ai da. Hkrat wa re na she dai shalawa wa gaw hkrap ai da. Hkrap re na nye nu nye wa shangai wa ai kaw na nye na wa ndai shan hkrai sha ai, shan ni nra ni kade sha tim hpa n byin ai. Nlungdin gawa na she byin ai ngu na hkrap re na she e hkau shalawa e ngai kaning hku mung ndang di, ya ngai na nlung sha na aten bai du sai. Dai majaw ya ngai nlung bai sha dan sa na yaw ngu na bapa chyayet hpang sha dan ai da. Kalang ta gawa dat ai hte di di re na sha dan ai da, shalawa wa gaw mau mat ai da. Nlung 7 hteng sha ai da, dai matsan ma gaw shat kaw si taw nga ai hte maren dai bapa chyayet sha na hkru mat ai da. Hkru mat re na she nambat 2 nang rau ngai nang na pasi grau kaba ai i, ngai na pasi grau kaba ai i shingjawng na ngu ai da. Sa wa le ngu da, sa wa u le ngu na tsun re na she dai shalawa na pasi shaw dat ai da. Dawng mi daram galu ai da. Dawng mi daram galu ai shalawa na pasi shaw dan ai hte shi gaw shi na makau kaw na janghkyen hpang shaw dat ai da. Shaw dat re na ndai gaw nye pasi re sai ngu na ra re na nlung din kaw ra di dat ai hte shalawa gaw mau mat ai da. Ndai daram ting kaba ai pasi nang gara hku masit ai ngu yang shinglet hkum galu ngu da, ga mung hkum shalaw ndai nye pasi re nga yang re, ga hkum shalaw nang sum sai yaw ngai dang sai ngu da. Mai ai mai ai ngu da. Nambat 3 nang rau ngai kadai na wa grau papa shingjawng ga ngu da. Shingjawng ga ngu yang she dai shalawa gaw mi shi nlung din sha na hkrat taw nga ai wa mara dat ai da. Hkrawng nga nlung din ntsa kaw mara dat jang matsan ma wa gaw shi na makau kaw na shanghkawp kaba law nlungdin kaw mara dat ai sha lawa wa she htalap ai zawn re na kajawng mat ai da. Kajawng mat re na aw masha ngu gaw bawnu law nga hka, masha ngu rau ngai gaw nmai shingjawng sai ngu na shi dai shani kaw na shi nam kaw rawng re na nam kaw na rai sha sha re na dai ni du hkra anhte nmu lu mat ai da. Dai matsan ma gaw da dai shalawa na sut gan hpang la re na nta de wa re na kanu kawa ni hpang myit dik lam jaw re na shan nu wa ni pyaw pyaw re na nga mat ai da. |
