Item details
Item ID
KK1-0392
Title Jaugawng kaba a lam (The great hunter)
Description Transcription (Lu Hkawng)
Ya ngai hkai na maumwi gaw moi lai wa sai aten ni hta e shan gap sha ai jaugawng langai mi nga ai, dai jaugawng kaba a mying gaw Batwa Naw Ka ngu ai jaugawng kaba re ai da. Moi shawng de kahtawng langai mi hta jaugawng kaba Batwa Naw Ka ngu ai la langai mi nga ai. Shi gaw nam maling kata de nam shan chyu tam gap hkawm na nga ai jaugawng kaba langai mi rai nga ai. Mare buga na masha ni gaw shi hpe mare na bungli ni hpe nau wa n galaw garum ai majaw shi hpe e mare masha ni nau n ra ai, rai tim mung dai kahtawng kaw na kahtawng Du wa hpe gaw shan kaba gap wa shagu shan magyi langai ngai dai mung Du wa hpe kumhpa jaw ai majaw dai mung Du wa gaw dai jaugawng kaba hpe grai tsawra ai. Grai hkungga ai nga nna tsun ma ai. Lani mi hta ndai jaugawng kaba Batwa Naw Ka gaw grai bum tsaw ai bum kaba langai mi de lung wa na shan tam ai shaloi shawng de shi lu gap sha yu sai Shat-nga ni hta na grau grau kaba ai Shat-nga kaba langai hpe mu hkrum na shi lang ai la-li ndan hte atsawm hkrak sha dai Shat-nga Ula kaba hpe gap dat sai. Dai Shat-nga dai gaw yu maya Shat-nga sha n re ai, shi gaw madu lu ai nat kaba ni jawng hkawm ai Shat-nga Ula kaba re ai majaw gaw shi hpe gap dat ai hte mare gaw shi a madu ni nga ai bum kaba de shakut na shi gaw kalang ta madu wa hpang de nat kaba hpang de shi hprawng lung wa na shi hpe tsi tsi la shamai nga sai. Rai tim mung jaugawng kaba wa dai gaw shawng e shi gap dat ai Shat-nga Ula kaba hpe lu la hkra nga nna myit n-gun dat na malu masha hte hkrat re na Shat-nga hpe hkang tam shakut hkawm lung wa yang bum kaba ai pung-din shara langai mi hta grai tsawm la ai nampan nampu ni hte mawn sumri da ai zawn re ai bum kaba hpun-din ka-ang hta nlung lung hpran ni grai htuk manu ai hku na nga nga ai hpe shi mu ai da. Dai shaloi shi gaw "Ndai ram htuk ai lung hpyen mung nam mali mala de nga nga a hka law" ngu ai myit hte shi gaw dai shara hta hkring sa na shi gun ai malut hka yawm hpe lu apak nga ai da. Dai shaloi shi sa nga ai bum pung din kaw lung wap lung pu kaba langai mi nga ai kaw na yu mau na zawn re ai makyit maka san ai ru gaw raw, na gaw jawn, myi gaw pawn yu yang shamying nchye shinggyim masha zawn zawn shinggyim masha gaw n rai hkrun kanu langai mi le pru wa na "E jaugawng kaba nang ndai shara gaw ngai na shara re nang gun ai malut hpe n mai lu ai ndai malut gaw ngai n ra ai, htaw htawk hkawm nna laga tsan ai de lu u'' ngu na nat kanu dai hku tsun ai shaloi jaugawng wa gaw "Nang kadai rai e ngai hpe dai hku n mai tsun ai, ngai nang hpe gap kau na" ngu na shi lang ai la-li ndan hpe shachyen nna gap na matu maw wa yang ndai makyit mahkat san ai nat kanu kaba gaw "E jaugawng kaba nang hpe ngai grai hkungga sai law gap gaw hkum gap sat rit rai tim mung nang hpe n gap dat jang gaw nang hpe ngai nang ra sharawng ai hpa baw rai tim jaw lu ai jaw na" ngu na ndai nam mali ning awp kata de nga ai tsa dan nat kaba gaw dai hku na tsun ai da. Dai hku tsun ai shaloi "De mai sa nang hpe ngai du mayu ai buga de du lu ai ngu ai pyen sam sinkaw ngu ai dai jaw lu na i" ngu yang jaw lu ai, bai de gaw ngai sha mayu ai lu sha ni hpe ya lu na ya sha na ngu yang sha lu ai baw nang jaw lu ai i ngu yang jaw lu ai" nga na ga sadi hkam da sai re ai majaw "Mai sa jaw lu yang gaw la su" nga na "N jaw lu jang gaw na a lung hkrun lam de ngai malut nat shamawn nna nang hpe jam jau kaba jaw kau na" ngu dat na shi hpe ndai jaugawng wa hpe jaw na matu manaw sha ndum yam bu hte pyen sam sinkaw hpe sa la shangun na jahkring sha rai yang pyen sam sinkaw hte manaw sha ndum ngu ai hpe "Lu na law jaugawng kaba e manaw sha yu u hpun nna pyen yu u" ngu na "Mai sa ya nang dai kaw nga u ngai naw chyawm yu na manaw sha ndum yambu kaba hpe "Ngai ndai baw sha mayu ai law'' ngu tsun ti manaw kaja wa sha shi sha mayu ai lu sha ni dai yambu kata rawng taw ai hpe shi sha lu sai, "Mai sa ndai gaw byin sai, ya ngai hkawm lu kun" ngu ti ndai pyen sam sinkaw ngu ai hpe la hpun na pyen hkawm wa yang kaja wa sha pyen hkawm lu re ai majaw gaw "Mai sai law ngai mung nang hpe chyeju dum ai grai akyu pru sai dai majaw nga nga nu hpang de hkrum tim mung jinghku rai ga yaw" nga nna tsun hkat na tsa dan nat lung wap de nga ai mung shi a shara de shang wa sai, ndai wa gaw manaw sha ai yambu mung gun pyen sam sinkaw hte shi a la-li ndan mung lang re na pyen gawai hkawm mat wa ai shara shagu pyen hkawm wa yang e shanhte mung ga hte mana makan tsan ai Hkawhkam langai mi up nga ai Hkawhkam wa a Hkawhkam ginwang kata de shang du ai shaloi she Hkawhkam wa a nta makau kaw nampan sun kaba re langai mi nga ai da, hkawhkam shayi sha grai tsawm ai mana maka tsawm dik re num kasha dai gaw nam pan sun yu lajang nga ai hpe shi pyen sam sinkaw hte pyen hkawm yang lu ai majaw kalang ta tsawra myit kaba hte galang zawn zawn pyen htim nna Hkawhkam shayi sha hpe hta ga-aw la ai shaloi Hkawhkam shayi sha gaw hkrit kajawng na lak lang ai, rai tim mung ndai jaugawng kaba Batwa Naw Ka ngu ai wa gaw "E Hkawhkam shayi nang n mai hkrit ai, ngai mung shinggyim masha langai mi rai nga nngai hkum lak u nang lak jang gaw ngai nang hpe hkan n dang nna jahkrat dat yang nang si na re" ngu ai majaw gaw atsawm sha hkan nan nna pyen mat wa htaw majoi shing ra bum kaba de rau re nga yang gaw majoi shingra bum ka-ang de du ai shaloi gaw mana maka re tsawm ai lung hpyen lung ka ni nampu nam pan hkrum zup ai hku na pu tsawm nga ai shara langai mi kaw shan lahkawng pa re nga yang she manaw sha yam bu ndum kaw na shan lahkawng sha mayu ai lu mayu ai lu sha hkum sum hpa hpe lu sha htek sha re nga rai nna shan gaw tsun shaga chyai mahkawn shabrang lam ni tsun chyai ai, lusut lusu lam ni tsun chyai, kung dinghku a lam ni tsun chyai tsawra ngawn nja galoi mung shan lahkawng hkrai rai tim mana maka tsawra hkat sai masha kadai n nga ai shara rai sai, shan lahkawng sha nga shan hpe tsun na masha n nga sai, mana maka ra hkat ti nga wa sai da. aten law law dai hku na nga woi wa ai rai tim mung dai Hkawhkam shayi sha gaw moi shawng de kanu kawa Hkawhkam jan hte hkawhkam wa a kata kaw nga ai aten hta tsawra hkawm chyai ai manaw manang jan, manaw manang wa ni shi a chyinghkai kanu shi a chyinghkai kawa yan hpe myit dum tsawra kau sai, shi gaw dang re marit sawng ai majaw gaw lani mi hta she dai de hprawng wa na matu myit na madu wa ngu na Batwa Naw Ka hpe she "E jaugawng kaba nang ngai hpe tsawra ai rai kun? tsawra ai da" Tsawra ai rai jang gaw le ra htingba kaw tu ai hpun kaba kaw noi ai nampan pu hkyeng, nampan pu hpraw ndai lahkawng di la nna ngai hpe maw ngu rit shaloi gaw ngai gaw myit dik ai'' ngu ai da. "Mai sa" nga hprawng wa na gaw shi n shadu sai le, shi hpe tsawra sai re ai majaw dai jaugawng gaw le shakut na le nampan sa di, nampan sa di na maw yang she "E jaugawng kaba tsawra wa ngai gaw wa wa sai yaw nang chyu sha nga nga nu, ndai manaw ndum kaw na sha, sha sha re ti nga nu, ngai gaw nu yan wa hpe marit ai ngai tsawra ai manang jan manang wa hpe marit ai yaw'' ngu pyen san sinkaw hte pyen re shakram da kau sai da. Shakram da kau jang gaw ndai Batwa Naw ka ngu ai wa gaw hpa rai tim mung e nye tsawra jan hprawng mat wa ai gaw shi ngai hpe tsawra ai rai yang di ya ngu ai nampan di sa shangun ai kaw hprawng mat wa sai re ai majaw shi n nga tim mung ngai nampan ndai hpe di lu hkra ngai gaw shakut na'' ngu ti nampan hkyeng di yang she nampan dai manam jang she ladi galu wa ai da. Ladi grai nga re galu mat wa ai, ladi grai galu mat wa "Ya chyawm gaw ngai a tsawra ai Hkawhkam shayi mung shakram da, ladi mung galu wa ngai langai sha kaning re nga na'' nga ai hku myit rai tim oh ra wa di yu ga nampan hpraw nga ai nampan hpraw dai hpe sa di yang gaw ladi gaw hprun hprun rai ladi ga dung mat wa ai mi na hku rai mat wa ndai gaw re na re, hkyeng ai nampan gaw ladi galu ai hpraw ai nampan gaw ladi ga dung wa ai mi na hku byin ai ngu nampan hkyeng hpe laga htuk nampan hpraw hpe laga htuk re na rai wa ai da. Wa na nga myit yu myit yu re yang "Hpa rai tim mung e ngai jaugawng kaba langai mi re la-li ndan mung ngai lu ai, hkrit hpa nga tim ngai gap chye ai sha hpa manaw sha ndum tawn da ya ai gaw shi ngai hpe tsawra ai si gaw n si wa u ga'' ngu ai re, "Ngai hpe tsawra ai re ngai hkang na re" ngu na majoi shinra bum kaw na yu wa ai wa grai yak ai da, hpun kaba ntu ai kaji kajawng sha tu ai nlung ni ma tek yu yang galau wa ai hpun ni ma noi yang hkrat wa ai, dai majaw mana maka shakut ti tsawm mari tsawm ra n-gun dat na she majoi shingra lagaw du le ga de du dai kaw ma jep ai kalang ma Hkawhkam shayi hprawng wa ai Hkawhkam wa ni nga ai buga de la-li ndan lang manaw sha sha rai na sa let she mi na shi a tsawra jan nga ai Hkawhkam wang de hprawt rai sai da. Hprawt rai jang gaw gara kaw nga ai kun ngai hpe tsawra ai num ndai jan gaw tam chyu tam tsawm mari she Hkawhkam shayi sha yup ai yup gawk chyinghka lam kaw she kaya masit kaya masit sha tsawm na jawmna yu re nga ai hpe mu ai da. Dai majaw i nang hpe gaw ngu yang she dai shi a nampan hkyeng hte nbung shapoi ti gawut bun na ladi galu wa na matu i, dai gawut dat yang she dai Hkawhkam shayi sha wa ladi wa kraw kraw kraw ladi wa ning galu wa ai da, rai jang she kanu yan kawa hpe "E nu yan wa e ladi grai galu wa sai kaning di na i" ngu yang she Hkawhkam shayi sha ladi galu wa sai majaw ndai Hkawhkam mung ting hta e mam dan lak le chye ai ni hpa rai ning wat lu ai chye ai ni yawng hpe shaga na ladi gadung wa na matu tsi tsi chye ai wa hpe gaw nye kasha Hkawhkam shayi sha ya na Hkawhkam hkaw ka-ang hkup mung jaw na nga ai hku na she" ndau shana sai da. Ndau yang gaw la dai gaw na sai da. "Dai gaw ngai chye ai'' ngu ai da. "Chye jang gaw" shi hpe shaga la na she le Hkawhkam shayi sha yup ai yup gawk de she sa shangun ti she dai de ladi galu rai taw nga ai kaw she mung jahta chyai na dai nampan jahpraw dai wa gayup ti gawut jang she htun htun htun ti hprawt re kaja wa ai da. Rai jang shan tsawra sai da, amyu myu mung di sai da e, shan tsawra hkat sai, rai yang gaw ndai hku ngu ai da. "Hkawhkam shayi e dai jang moi nang hpe majoi shingra bum de e, hprawn la ai wa hpe nang n myit dum ai i, majoi shingra bum de lung woi ai wa hpe n tsawra sai i" ngu ai da. "Dai wa hpe mung grai tsawra ai rai tim mung ya gaw nu yan wa gaw nang hpe jaw sha sai majaw nang kaw she wa na law nang hpe grai ra ai'' ngu ai da. Dai shaloi dai jaugawng wa gaw "De dai de lung woi ai wa ngai ma rai yang gaw nang ngai hpe ra na i" ngu ti tsun ai da. Shaloi gaw "Ngai shi hpe mung grai myit dum ai grai tsawra ai nga jang gaw nang hpe no (1) pyen sam hte nang hpe ngai htaw wa ai, majoi shingra bum kaw nang hpe ngai woi nga ai manaw sha ndum yambu hta na malu masha ni sha ai an rau nga ai, nang ngai hpe le nampan di sa su ngu nampan di sa ai kaw nang hprawng wa ai" ngu tsun "Grai tsawra ai law'' nga ti lamu noi nga ai da. Nau kabu ai majaw kawa hpe "Wa e moi ngai hpe majoi shingra bum de e pyen woi ai la wa rai nga ai, la ndai wa gaw" ngu ai da. Rai jang she Hkawhkam wa gaw kalang ta pawt nna she dai kaw na Hkawhkam wa a ma hpyen la ni hpe she "La dai wa hpe nang hkum nga shangun kalang ta gayet gyit le ndai hku grai tsan ai shara de sa kau mung" ngu kau ai da. Dai majaw shi hpe gaw hkawhkam wa gaw dai hku ngu jang she hkawhkam wa gaw hpye la ma ni she kalang ta gyit di she gumra jawng htaw grai tsan ai de sa kau da sai da. Shi n nga lu sai rai tim mung shi gaw myit nhtum ai "Ya nhte hpe gaw kasha hpe mung ladi galu shangun na kawa hkawhkam wa hpe mung ladi galu na kanu hpe mung ladi galu shangun na myit rawng na bai sa ai da. Bai sa na kanu kawa ni yawng hpe nampan hkyen wa gayup shamawn dat yang she Hkawhkam wa a ladi mung galu hkawhkam jan a ladi mung galu shayi sha ma a ladi mung galu masum hte a ladi galu ai da. Rai yang gaw "E ladi galu ai anhte masum hpe tsi bai tsi ya na ladi kadung shangun jang gaw nye kasha hpe nan nan jaw sha na hkawhkam hkaw hpe mung ka-ang hkup ap garang ya na" ngu tsun ai da. Shaloi she kasha Hkawhkam shayi sha gaw "Wa e nang gaw masu ai gaw moi ya mung n ya ai ya rai tim mung nye ladi kadung, wa na ladi kadung, nu na ladi kadung re yang e nang dai gaw ngai hpe n ya ai re shi n hkraw sai ngu ai da. "Ya na ga sadi laika ni ka da ga teng teng sha jaw na teng teng sha ya na sa woi la mung ngu gumra hte lu sha hte bu hpun nba hte hpa hte re tim bai kalang mi bai lekmat htu da ga, ga sadi ni ka da ga, nye ladi kadung, hkawhkam jan a ladi kadung, nye shayi sha ladi kadung ya yang nang hpe ya na n masu ai ya nang ya jang nga yang ngu nampan hpraw wa gawut dat jang she Hkawhkam wa a ladi mung kadung Hkawhkam jan a ladi mung kadung shayi sha ma a ladi mung kadung masum hte a ladi wa moi na zawn rai jang she "Gai ya gaw jaw rit" ngu jang she Hkawhkam wa mung myit malai lu sai le, n jaw yang mung hpang de bai galu wa na hpe shi hkrit ai majaw gaw "Mai ai jaugawng kaba wa nang hpe nang hpe ngai nye shayi sha ya na Hkawhkam hkaw ndai kaw nga u nye a (Lu yung) kaba tai na nga u" ngu ti shayi sha ma jaw sha bai dai Hkawhkam hkaw kaw mung bungli kaba grai kam mai ai shara kaba kaw e ahkaw ahkang jaw rai ti dai Hkawhkam shayi sha la na jaugawng kaba dai gaw dai zawn rai ti shi grai ngwi pyaw wa sai nga maumwi gaw ndai kaw htum sai, maumwi ndai gaw hpa rai tim mung shakut ai, myit nhtum ai, ndai hpa baw ngu na i shakut ai ladak shaw nna galaw ai re ai majaw shi hta hpang jahtum gaw (Ah na hkan ma ata tsan) nga ai shi grai pyaw ai hku na nga lu ai maumwi rai sai re law grai chyeju kaba sai htum sai.
Origination date 2017-02-02
Origination date free form
Archive link https://catalog.paradisec.org.au/repository/KK1/0392
URL
Collector
Keita Kurabe
Countries To view related information on a country, click its name
Language as given Jinghpaw
Subject language(s) To view related information on a language, click its name
Content language(s) To view related information on a language, click its name
Dialect Standard Jinghpaw
Region / village Northern Myanmar
Originating university Tokyo University of Foreign Studies
Operator
Data Categories primary text
Data Types Sound
Discourse type narrative
Roles Keita Kurabe : depositor
L. Tu Awng : speaker
DOI 10.4225/72/598894d4c340f
Cite as Keita Kurabe (collector), Keita Kurabe (depositor), L. Tu Awng (speaker), 2017. Jaugawng kaba a lam (The great hunter). EAF+XML/MPEG/VND.WAV. KK1-0392 at catalog.paradisec.org.au. https://dx.doi.org/10.4225/72/598894d4c340f
Content Files (3)
Filename Type File size Duration File access
KK1-0392-A.eaf application/eaf+xml 76.1 KB
KK1-0392-A.mp3 audio/mpeg 18 MB 00:19:42.170
KK1-0392-A.wav audio/vnd.wav 650 MB 00:19:42.140
3 files -- 668 MB -- --

Show 10 Show 50 Show all 3

Collection Information
Collection ID KK1
Collection title Kachin folktales told in Jinghpaw
Description Recordings of Kachin folktales and related narratives in Jinghpaw. These materials were collected by Keita Kurabe, Gumtung Lu Awng, Sumdu Ja Seng Roi, Hpauhkum Htu Bu, Labang Tu La, Gumtung Htu Nan, and Lashi Seng Nan as part of community-based collaborative fieldwork in northern Myanmar. A total of 2,491 stories with 2,481 ELAN files, 2,481 transcriptions, and 1,369 translations are currently available (March 25, 2024). Transcriptions were contributed by Gumtung Lu Awng, Pausa La Ring, Galang Lu Hkawng, Sumdu Ja Seng Roi, Hpauhkum Htu Bu, and Keita Kurabe. Stories were translated by Nbanpa Rita Seng Mai, Sumlut Gun Mai, Lazing Htoi San, Maran Seng Pan, Dumdaw Mike Tu Awng, Nhkum Htoi Awng, and Keita Kurabe.

Animated stories are available at:

https://catalog.paradisec.org.au/collections/KK3
https://www.youtube.com/@kachinfolktales
https://www.facebook.com/KachinStories

Other Kachin culture and history are available at:

https://catalog.paradisec.org.au/collections/KK2

Our research was made possible under the support of JSPS KAKENHI Grant Number JP17H04523, JP20K13024, JP20H01256, Linguistic Dynamics Science 3 (LingDy3) from Research Institute for Languages and Cultures of Asia and Africa (ILCAA), Tokyo University of Foreign Studies (TUFS), and JSPS Program for Advancing Strategic International Networks to Accelerate the Circulation of Talented Researchers "A collaborative network for usage-based research on lesser-studied languages."
Countries To view related information on a country, click its name
Languages To view related information on a language, click its name
Access Information
Edit access Nick Thieberger
Keita Kurabe
View/Download access
Data access conditions Open (subject to agreeing to PDSC access conditions)
Data access narrative
Comments

Must be logged in to comment


No comments found